Goomu juɓɓingol hajju Inaal hawrii lomtinirde hajju hikka oo, kawrital (miitiŋ) to leegal Siiseem sara jumaa Kattaar. Addani ɓe haaytude yahde toon hikka, ko sabu mum hawrude e woote. «Min pellitii naatinde mawningol ñalawma oo e gadda ndonaandi aadeeri kam paltoor gonɗo e leydi ndii, e ɗaɓɓirde laamu nguu nde ɗooftotoo konngol mum ngam ñawndude oo doosiyee ».
Ko noon kadi e wiyde Muhammed el Huseyn Kan hooreejo COVIRE, hajju Inaal waɗiraa ko ngam haɗde yimɓe yejjitde ndee bonannde, sibu ñawndugol oo doosiyee ina ɗaɓɓi kuuɓnugol sarɗiiji garooji ɗii : Goonga, Ñaawoore, Lomtingol e Ciftorgol. E nder ɗuum kadi, goomu nguu ina anniyii ɗaɓɓirde laamu Muritani nde mahata ɗo Inaal ɗoo maanditorde sahodinɓe 28 noowammbar 1990, kam jogaade sukaaɓe mum en, kam e siynude yamiroore jiytugol e maandingol gaññeeje waraaɓe ɓee, e niilnude sariya yaafuya suwee 1993 e ɗooftagol peeje ñaaaawoore e cosgol goomu njambureewu, ndimɗanngu hoore mum ngam lomtinande no haanirta nii loraaɓe ɓee. Goomu hajju Inaal hollii kadi mettere mum e etagol ñawndirde oo gagga peeje fuuntifuneere.
E wiyde Laam Tooro Kamara, « peeje laamu nguuɗoo ƴettunoo ngam ñawndude ɗee caɗeele njuumtaani, woni moƴƴaani ». « Ko waɗaa heen ina yawnii… Ko kewnoo koo, ko warhoore, yahatnoo ko e mumtude leñol ».
Bookara Aamadu Bah
