Alkamiisa 18 abriil 2013, guwarnama Muritani jaɓii eɓɓaande sariya yamiroore hooreejo leydi siifde « nanondiral jowitiingal e ƴellitgol keewal eddaaji pine »(la convention sur la promotion de la diversité des expressions culturelles »).
Ɗum feeñi ko e bayyinaango laamu nguu, yaltungo ñalnde aljumaa 19 abriil 2013.
Ngaal nanondiral UNESCOjaɓanoo ko ñalnde 20 oktoobar 2005. Ko kanngal wiyi wonde keewal eddaaji pine ko huunde waɗɗiinde wonande nehaagu moƴƴu, nde waawaa seerndeede e ndimaagu aadee. UNESCO jaggiri ngal nanondiral kadi ko huunde wallitoore julyultondiral (mondialisation) juumtungal.
Faandaare nanondiral ngal ko waɗde feere mbele pine fof ina teskee e tabitingol politikaaji pine, ngam fotndude yimɓe fof, fotnda fartaŋŋeeji mum en waawde naftoraade pine nokkuyankooje e pine goɗɗe winndere ndee.
