Mawningol hitaande 58ɓere Jojjanɗe aadee
Ñalnde talaata 12 desammbar 2006, Muritani mawninii ñalawma jojjanɗe aadee. Hikka woni hitaande 58 ɓere ko Fedde Ngenndiije Dentuɗe (ONU) heptini bayyinaango huptodinngo jojjanɗe aadee. Ɗum waɗnoo ko e hitaande 1948, caggal wolde adunankoore ɗiɗmere. To bannge laamu Komiseer Kalfinaaɗo ko fayti e jojjanɗe aadee kam e hare baasal yuɓɓinii ñalawma kirjingol ko fayti e ɗuum. Pelle keewɗe e yimɓe heewɓe tawtoraama ɗii ñalɗi. Pelle Muritaninaaje ɗe ngonaa laamuyankooje ɗeene mawniniri oo ñalawma ko ɗaɓɓugol e laamu Muritani nde ñawndata geɗe jotondirɗe e warngooji.
Dental Pelle ngenndiije Jojjanɗe Aadee (Forum des Organisations nationales de Droits humains (FONADH) ɗaɓɓirii laamu Muritani ñawndugol warhooreeji baɗnooɗi e leydi he e duuɓi jawtuɗi ɗi. Ɗum feeñi ko e konngol gardiiɗo Dental ngal, hono Mammadu Saar, haalnoo ñalnde mawningol hitaande 58ɓiire Bayyinaango adunankeewo Jojjanɗe Aadee. O noddi heen laamu e mudda ngu nde «waawnata ɗooftagol kuule gonɗe e bayyinaali e piɓondire adunankooje jowitiiɗe e cemmbingol e ndeenka hakkeeji aadee». E nder ɗum ɗoon, FONADH ɓuri teeŋtinde ko gartirgol juɓɓinangol Muritaninaaɓe taccinanooɓe e mooliiɓe to Senegaal e to Mali yantude e ñaawgol tuumaaɓe njaɓɓii jojjanɗe aadee, e les njiimaandi laamu Maawiya wul Siidi Ahmed Taaya, hakkunde 1986 e 1992. Dental ngal ɗaɓɓii kadi jooltugol hujjaaji denndaangal ɓe bonanndeeji ɗi njettinoo yantude e ittugol macungaangu kam e ñaawoore goonganteere jaggiraaɓe sabu miijooji mum en (islaamiyankooɓe tuumaaɓe, sokaaɓe ko ina ɓura 18 lewru), walla goppitgol mum jooni-jooni, yantude kadi e goppitgol Muritaninaaɓe dummbaaɓe to Guwantanamoo (sabu tuumeede ɗum en jeyeede e Al Kaydaa). Wonande FONADH, ñawndugol bonandeeji baɗnooɗi e leydi ndi maa wallit beldital ngenndiwal e nder leydi ndi tee ina yahdi e wasiyaaji Goomu Afrik Joojanɗe Aadee e Ɓesnguuji.
E nder mawningol ooɗoo ñalawma, FONADH hollitii heen weltaare mum sibu leydi ndi yahrude yeeso to bannge politik kam e wellitaare huftodinnde e heeriinde gila ooɗoo ñalawma 3 ut 2005.
