Tawaama pine Ejipt ɓooyɗo ina nanndi haa ko ɓuri alaa e won ɗeen pine Afrik, ko wayi no Dogon, Ashanti, Yuruba ekn … Ngool ɗoon nanndugol ina holliti jiidigal luggal to bannge pine. Ɗiin nanndooji ina toɗɗii konngi, ina toɗɗii kadi won ɗiin aadaaji ko wayi no fijirlooji aawngo walla joopiiɗe golle ndema ekn…
Jiidigal hakkunde Ejipt ɓooyɗo e Afrik ina yahri kadi to bannge diineeji e deweteeɗi… Jiidigal kaɓirɗe pinal Kaɓirɗe ɓooyɗe e karallaagal waaño e awo ɓooyngal to Ejipt ndeen kam e ngal Afrik ko gootum. ɓalla kadi to bannge moori e firooji mum en, walla cabbi laamu ekn … Abuubakry Muusaa Lam waɗii heen wiɗtoojii paayodinɗi (eɗen njaakorii ma o facciran en ɗee geɗe fof, sibu konngol ñaaƴata ko e hunuko joom mum). Denndaangal dalillaaji annduɓe ko fayti e jiidigal hakkunde Ejipt e Afrik kuutorii ko fannuuji ganndal keewɗi, ko ɗum waɗi dalillaaji ɗi wonde mahiiɗi, cañiiɗi no feewi, mettuɗi riiwtude. Paamen noon wonnoo fayndaare Seek Anta Joop tan ko wiɗde anndude tigi rigi Afrik ngam Yoogde heen binndanɗe baawɗe en naftude hannde, wonaa yiɗde ferde laabi daartol kesi. Wonaa kadi yiɗde fiytaade becce e wastoraade daartol mum e iwdi mum, alaa, kono ko yiɗde anndude ɗo ummii e to ummii ngam waawde faamde no moƴƴi to fayi. Ko ɗum nii addani mo waɗde won ɗiin wiɗtooji politik ɗi o fenñini e deftere wiyeteende » Les fondements économiques et culturels d’un État fédéral d’Afrique noire (éd. Présence africaine, 1960) « . Ko ɗum kadi addani mo jeytoreede e politik leydi ɗo o jibinaa ɗo.
Yoogirde : wikipedia Firo : Bookara Aamadu Bah
