Kuuɓal Dowla Toppitiingal Debbo yiilirde toppitiinde ɓesngu e ɓiɗɗo Ndewaagu e hakkeeji galle, rewɓe e sukaaɓe wonande ko yowitii e sarɗiiji ɗowooji galle mbele ina wallita paamgol newingol loowdi sariya keso o e ko huuftidini, teeŋti noon e ko yowitii e jojjanɗe debbo e ɓesngu no lelniraa e deftereI e deftere II.
En pɗɗinooma winndannde nde gila e tonngoode 42, eɗen njokka kadi e ndee ɗoo tonngoode, ko heddi kadi haa tonngoode faande. …..
Deftere III
Naamnal : Ko yowitii e deftere III e ko renndi heen ?
Jaabawol : Deftere III ina renndini tiitooɗe ɗii, tiitoonde adannde nde haalata ko haala kellifuya, ɗimmere nde ko wakilaagu.
Naanmal : Hol nde neɗɗo yettotoo e jogaade (kellifuya waawde daranaade hakkeeji mum to bannge renndo ?
Jaabawol : ko kuulal 15 jowitiingal e sariyaaji farillaaji e piWondire ( code obligation et contrats) rokkata neɗɗo jogaade mbaawka daranaade hakkeeji mum to bannge renndo. Ɗum firti ko e sahaa nde neɗɗo yettii duuɓi sappo e jeetati timmuɗi rokkete kellifuya (kuulal 162).
Naamnal: hol nde neɗɗo hiisetee nattii jogaade kellifuya e ko huuftidini walla waasi huunde e kellifuya mum waawde daranaade hakkeeji mum to bannge renndo ?
Jaabawol : neɗɗo mo hakkilaani sabu cukaagu walla ɗaweede hakkille alaa mbawka daranaade hakkeeji mum to bannge renndo. Ina foti teskeede wonde neɗɗo puɗɗiiɗo hakkilde mo suwaa yettaade duuɓi kellifuya, walla yettiima ɗiin duuɓi kono ko bonnoowo jawdi, oon hiisetee ko kellifuya mum ina ŋakki (kuulal 163 e 164). l
Naamnal: hol pelle wakilaagu dewɗe laawol?
Jaabawol :
- wakiilu laawɗinaaɗo
- wakiilu basiyaaɗo caggal maayde
- wakiilu toɗɗaaɗo.
Haala ɗeen pelle ina sifaa e taƴre ɗimmere tiitoonde II e kuule 176 e 188.
Naamnal : Mbele ina joofaa ?
Jaabawol : eey wakilaagu ina joofa e ngonkaaji cifaaɗi e nder taƴre tataɓere nde tiitoonde II, kuulal 195 haa 202. Haa tonngoode aroore njokkiten
Fulo : Maamuudu Haaruuna Joop
