Nde juungo ngo taƴi, tawi ko laaɗe makko ina njoofa e tufnde ɓaali Jantaŋ. O wiyi yo laaɗe ɗe njiilte. Barmannde nde ɗaccaani mo haa o maayi. Ɓe memondiraani haahannde… haa hannde Suleymaani Baal e Suley Njaay njettondiraani ! Nde Suley Njaay maayi, Deeniyankooɓe ndenti, cuɓii Satigi goɗɗo, hono Suley Njaay Buubu Gaysiri Dewal Sawa Laamu ƴero Koli Tengella, oon woni Suley Njaay 2 ɓo. Ɓe ndarni mo, mbele ma won ko ɓe mbaawi gasnude.
« Sheex » Suleymaani Baal felliti waɗde jeeyngal mawngal, mooɓre mawnde, ngam samminde laamu Deeniyankooɓe, e haɓde e Hormankooɓe. Hormankooɓe, so ngariino, tellortonoo e oon sahaa ko ŋinnjaw. Ɗoon ɓurnoo welde taccirde. Suleymaani Baal e wondiiɓe mum, ɓiɓɓe soknaaɓe Fuuta, kamɓe kala ɓe pelliti fayde ŋinnjaw. Ndeen noon ɓe kuudiima, ɓe ndawi, ɓe mbaali 0ŋinnjaw. ƴahi haa weeti, gooto e Aañ-Aañɓe (ko ɓesngu Aañ en laamotonoo ŋinnjaw). addi gawri. Gawri ɓetaa ɗoon haa heewi, Hormankooɓe ina unanee. ŋewɓe ndenndinaa ɗoon, ina una, hay worɓe mbaddaama e maɓɓe ngam unde, sabu gawri ndi heewde. « Sheex » Suleymaani Baal e wondiiɓe mum ngari tan njooɗii, ina ƴeewa tawo, ina ngañi heñaade, ina ƴeewa tan, anndi heñaade ina bonna. Suleymaani Baal e wondiiɓe mum naati e nder Hormankooɓe, kaɓi e maɓɓe, wonti baŋ-yoo-baŋ « palee ! palee ! » Yoga e Hormaankooɓe ndoondaa, piyaa e leydi, woon heen mbaraa, woodi heen mo o neli to mawɗo maɓɓe, o wiyi mo :
– « Mbiɗo nel ma to mawɗo mon. So a yahii, mbiyaa mo ko heddii ko, wonani mo gaay ko conndi e kure, gawri alanaa mo gaay, jiyaaɓe ngalanaa mo ɗo. Ko odañatnoo ko, o dañii, ko o dañaano, o wontaa ɗum dañde ! » Muudo Horma helaama ! Suleymaani Baal jokki hare mum e Safalɓe.
Ndeen Suleymaani Baal e wondii ɓe mum mbaaldii jamma gundabi, aɓe njogori haɓoyeede Fori, o winndi ɓataake gooto haa gasi, o noddi sehilaaɓe makko, hono Aamadu Siree Anta Ngiji, e Alfaa Aamadu Seydi ƴero Buso. O holli ɓe kaayit o. O wiyi heen ko janngo e jam, so tawii o maayii, yo ɓe tuugno e doosɗe ɗe o lelni e kaayit oo, ngam toɗɗaade almaami. So tawii kadi aɓe cuɓoo almaami, yo ɓe cuɓo Abdul 2aadiri Kan. Caggal ɗum ɓe njahi Fori, nootitoyaade e wolde. Ndeen ɓe njettiima Fori, ko toon Suleymaani Baal heddii. Ndeen o maayii Fori, ɓe ubboyi mo ko Jeeri Tummbere, sara 7okki Sammba Gelaajo Jeegi, heedti ko rewo wuro Jowol. Ɗum hawri ko e hitaande 1775. Joofii.
E konngol Tijjaani Aan (Yo Alla yurmo mo, yaafoo mo, haarna mo aaljanna, aamiin).
