Goomu diisnondiral wonande Muritani ko batu ɓurngu maantinde hakkunde dowla Muritani e gollodiiɓe mum to bannge faggudu. Ko e nguun batu ɓeen kunotoo wallitde leydi ndi, haa arti noon e ñamlude ɗum kaalisaaji mbele ina waawa siynude tuugnorgal mum ƴellitaare, haa arti noon e tuugnorgal toɗɗingal hare baasal. Hikka batu ngu jooɗii ko Pari, ñalnde 4 e 5 desammbar 2007. Muritani « hebbinii toon jeyba mum » : ko ɓe kunanaa toon tolniima e miliyaaruuji 2 e 104 miliyoŋ dolaar Amerik (ko ina ɓura 500 miliyaar ugiyya). Ɗum ɗoon noon ko wonande tuugnorgal duuɓi tati tan (2008-2010). Ko ina ɓura 40 delegaasiyoŋ tawtoraama batu ngu, tawi ko gollodiiɓe Muritani e juɓɓule adunankooje, njuurnitii no moƴƴi tuugnorgal golle laamu Muritani. Hay so haalaaka, ina anndaa wonde ɓe njaɓii k oɓe kollitaa ko, sibu kamɓe fof ɓe ɓeydii juuɗe.
Laamu Muritani, e gardagol hooreejo hilifaaɓe (jaagorɗe) hono Seyn wul Seydaan, huniima gollaade ngam ustude baasal, yaawnude mbayliigaaji mbele ina yettoo Toɓɓanɗe Ujunannde ngam 9ellitaare, ko anndiraa OMD (Objectifs du Millénaire pour le Développement). O siftinii kadi wonde Muritani woni ko e daawal teskinngal e nguurndam mum, maantinirngal yiɗde taftaade ngootaagu mum e luggiɗinde demokaraasi, gardagol moƴYol, ƴellitgol jaawngol leydi ndi, ƴellitgol keɓe aadeyankooje e kaɓgol e baasal e ɓurondire. Tawtoraaɓe Leyɗe :Almaañ, Ostarali, Siin, Kore, Espaañ, Leyɗe Dentuɗe Amerik, Farayse, Geres, Itaali, Sapoŋ, Kataar, Laamaandi Ndentundi (Angalteer), Tunisi.
Ko ina ɓura 23 Fedde adunankooje tawtoraama, ko wayi no : Arab Authority on Agricultural Investment and Development, Banke 9ellitaare Afrik, Banke Lislaamiyanke ngam 9ellitaare, Goomu Orop, Banke Orop ngam Gollal, Goomu nduumiingu hakkunde leyɗe haɓotoongu yooro e nder Saahal, Booñ Arab, FAO, UNICEF, ONUDI, PAM, UNESCO e FMI ekn …
