Tuggi talaata 26/02/ haa 01/03/08 ñalɗi heblo jannginooɓe yuɓɓinaama ɗo e Likseyba e ballo ndiral e fedde winndereyankoore wiyeteende F.L.M e catal mum jooɗingal to Kayhayɗi, laamorgo diiwaan Gorgol. Ko kebloowo fanniyanke, Muusaa Jibi Taal, catal F.L.M. addi yo heblu jannginooɓe Catal Likseyba ngam ɓeydana ɗum en humpito e karallagal janngingol.
Ñalɗi ɗi udditi ko ñalnde 26/02/08 e tawteregol terɗe Catal Likseyba e garanɗo meeri Likseyba e hoohooɓe wuro ngo. Udditaa ko e konngol Faatimata Saydu Sal haalii e innde meer Likseyba, Mammadu Maamuudu Kan, o yettii Fedde Ɓamtaare Pulaar e ooɗoo diiwaan; ko noon ne o yettiri F.L.M adduɓe ballal mum en haa ngoo heblo waawi waɗeede, o duwii nde ñalɗi ɗi njahrata no haaniri ni, ko tijjaa ko, dañee heen. Nde o rowi ko Abuu Bookar Sal, cukko hooreejo catal ƴetti konngol, bismii F.L.M e kebloowo o e innde hoyreejo catal, Abuu Hammadi Dem e innde yiilirde catal Likseyba e terɗe fedde Ɓamtaare Pulaar e Muritani. O yetti F.L.M e ngal ballal teskinngal, ballal gila e defte e alluwal haa yettii ko soodee kaɓirɗe ɗe ina coftiniree kala dariiɗo e jannginde e catal he. Ko noonne e feewnande catal ngal tampoŋ. O haalii heen, ngoo heblo ma ɓeydu jannginooɓe ɓe, wuurna catal ngal, hokka ɗum daartol kesol e nder nguurndam mum.
Nde ɗum ɓenni ko Huley Mboh, gardiiɗo catal F.L.M e diiwaan Gorgol ƴetti konngol, o yetti catal Likseyba e waawde jaɓɓaade ngooɗoo miijo. O sifiima hol ko woni F.L.M e hol darnde nde F.L.M darii e nder winndere nde, tuggi nde sosaa nde, caggal hare adunankoore ɗimmere, darnde fedde nde ko wallude lohɓe . Lohɓe noon e kala banngeeji : to jaŋde e to ndema e to cellal e to faggudu fof, kadi nde wonaa laamuyankoore. O hollii tan hono ngoo heblo ɓe mbaɗii ɗum Kayhayɗi e to Siiwe e to Seyyeen Gabaɓe, fof ko ngam wallude hatanteeɓe, gila hanki ina ndarii e yarlitaare, ena kaɓoo majjere, miijetee ko cate F.B.P.M gonɗe ɗo e falnde Kayhayɗi. O teeŋtinii tan ma ɓe ndewindo duɗe ɗe mbele ko yiɗaa ko ena dañee.
Nde o rowi ko hoohooɓe wuro ngo ƴetti konngi. Abuu Aamadu Joop, Hoyreejo teddungal catal ngal, jibi Mammadu Kan e Aamadu Aali Boolo Njaay, gooto heen kala yettii darnde catal ngal, yettii F.L.M e darnde darii ɗo e diiwaan he, e balle mum limtilimtinɗe e kala fannuji.
Nde konngi kala njoofi, 23 jannginoowo puɗɗii heblo mum en haa ñalnde aset 01/03/08. Ko ndeen ñalɗi ɗi njoofi. E nder ɗii ñalɗi janngaama heen fannuuji jannginirɗi e hol no duɗal ɗowirtee haa jaŋde mum yahra no haaniri. Ñalɗi ɗi njoofi e weltaare wonande F.L.M e catal Likseyba, ɓe piWondirii siynude tugnorgal jaŋde nde e ballondiral nokkuuji ɗiɗi ɗii kala.
Abuu Aamadu Joop to likseyba gorgol.
