Hakkunde 200 et 400 ujunere ɗanniiɗo ena hannde e Farayse tawa njogaaki kaayitaaji. Ko heewi e maɓɓe ko ɓaleeɓe Afrik. Nguurndam maɓɓe ko hakkunde hakkunde no heɓiri kaayitaaji e waɗdude e polis tuktukordu. Ñalnde kala ko teemedde njaggetee, uddee to diiwaan mooftirde inniraaɗo « Zone de rétention ». Nokku ɗo ɓe coketee ɗoo ena heewi wiyɓe hay mbabba tugal waawaa wuurde toon Alla e makko mettude : gila e tuundi haa e ŋakkere deeƴre. Laamu Farayse hannde ena eɓɓi nawtude « suuɗiiɓe » heewɓe to leyɗeele mum en. Gila Nikolaa Sarkosii araani e laamu, ñalnde kala omo fewjana ɗanniiɓe ngam yaltinde ɗum en leydi Farayse. Ena jeyaa e ko waɗi mo toɗɗeede laamɗo sabu añɓe arani en ɓee kala ko kanko ngootani. Dawrugol makko e ko fayti e arani en ko salaade ari oƴƴoo. Ko « suɓaade mo Farayse yiɗi yo jooɗo » woni hannde ko woni e eɓɓo makko. Firti ko kala mo Farayse yiɗaa, fotaani hokkeede kaayitaaji. Hol mo Farayse yiɗi ? Ganndo. Galo. Hay gooto waawaa wiyde ko ɗum. Faamama tan ko Farayse yiɗii nattude wonde leydi teddundi, njaɓɓotoondi mooliiɓe ɗo ummorii kala. Farayse anndiraa haa jooni ko wonde leydi hakkeeji aadee.
Kono hannde, yoga e anndue mbiyi Farayse yahrii caggal no feewi e fannu hakkeeji ɗanniiɓe e arani en. E nder lebbi seeɗa, polis Farayse ina yooɓtoraa e maayde « suudiiɓe » ɗiɗo. E yontere ɓennunde nde, ko sukaa Maalinaajo fiyii e ndiyam ngam yiɗde daɗde poliseee sabu makko waasde jogaade kaayitaaji. Ndeke o waawaa ndiyam, ko kulol jaggeɗede ena nawtee tan jaggi mo. O yoolii, fitaandu waasaama, kaayitaaji ndañaaka. Hade ɗum, ko debbo gooto jeyaaɗo Siin diwi fallanteere yani e leydi maayi. Keñaanaajo gooto kadi wartii sabu mum hulde nawteede to leydi mum. Pelle kaɓantooje « alaa-kaayit en » ceppii seppooji keewɗi ngam joopaade golle bonɗe ɗe laamu ngu hollata arani-en ɓe. Sahaa kala, ɓe paloto laaɗe diwooje ngam haɗde polis nawtude yimɓe leyɗeele mum en. Yontii hankadi nde laamuuji men ƴurtii seeɗa.
Yawaare nde ko e maɓɓe woni sabu ɓe koriima faggaade ko ena joɗɗina sukaaɓe men e leyɗeele mum en haa ɓee ena mbeddoyoo potaali mum en e maaje. Kono hay so wayii noon, laamɓe men ena poti yaltinde ƴiiƴe mum en ngam hollude Farayse en ngonaa jaɓooɓe ɗanniiɓe men ena mbaɗee ɗee geɗe.
