Kuulal 72 : Ina waɗɗii guwarnama rokkude parlemaa, so ɗaɓɓii, e nder mbaydiiji cifaaɗi e sariya, denndaangal laɓɓitinooje jowitiiɗe e gardagol mum e golle mum.
Kuulal 74 : Horeejo hilifaaɓe kam e hilifaaɓe ko naamnitteeɓe yeeso Asammbele. Oon kellifuya politik fawii ko e ciynugol ko wiyetee ɗaɓɓaande hoolaare (ŋuestion de confiance) e ɗaɓɓaande goppugol golle (motion de censure). Caggal nde batu hilifaaɓe yeewti e tuugnorgal ngal, hooreejo hilifaaɓe gaddanoo guwarnama mum tabitingol tuugnorgal golle ngal kam e bayyinaango politik kuftodinɗo, heen sahaaji, yeeso Asammbele ngenndi. Asambele yedditirtoo golle guwarnama ko gootgol ɗaɓɓaande goppugol golle. Ɗaɓɓaande goppugol golle nde depitee joɗɗini to Asammbele, alaa e sago waɗa ndeen tiitoonde haa laaɓta kam e siñaatiir makko kanko joɗɗinɗo o. Ndeeɗoon ɗaɓɓaande waawata joɗɗineede tan ko so tawii, ko famɗi fof, tataɓal (1/3) terɗe Asammbele ina ciifi ɗum. Ɗaɓɓaande hoolaare kam e ɗaɓɓaande goppugol golle mbaawaa wooteede ko adii capanɗe nay e jeetati (48) waktu caggal nde njoɗɗinaa nde.
Kuulal 75 : woote gittugol e golle (ɓote de défiance) walla ƴettugol kuulal goppugol golle ina addana guwarnama dimisiyonde (woppude golle) ɗoon e ɗoon. Ɗiiɗoo wooteeji tabitta tan ko nde keɓi keeweendi depiteeji asammbele o. Limetee ɗoo tan ko woote jaɓɗe liɓgol guwarnama o. Guwarnama liɓaaɗo o ina jokka golle gaadoraaɗe haa nde hooreejo leydi toɗɗii hooreejo hilifaaɓe e guwarnama keso kala. So tawii ɗaɓɓaande goppugol golle riiwtaama, kamɓe siifnooɓe ɗaɓɓaande nde ɓe mbawaa sakkitde woɗnde e ndeen joɗnde wootere so wonaa e sarɗi cifaaɗo e taƴre aroore les nde. Hooreejo hilifaaɓe ina gaddoo kellifuya guwarnama mum yeeso asammbele ko fayti e gootgol winndaande jaɓaande e batu hilifaaɓe. E ɗoon sahaa, hiisetee ko ndeen winndaande jaɓaama, so wonaa taw noon ɗaɓɓaande goppugol golle joɗɗinaande e nder waktuuji 24 dewɗi heen ɗi wootaa ko e sifaaji joopaaɗi e nder taƴre adannde ndeeɗoo winndaande. Hooreejo hilifaaɓe ina waawi ɗaɓɓirde senaa jaɓgol bayyinaango politik huftodinngo.
Kuulal 76 : So tawii ɗum kewii, uddugol joɗle gaadoraaɗe walla keñoraaɗe dirtinte mbele geɗe cifaaɗe e kuulal 75 ɗe ina ndaña siyneede.
Kuulal 77 : So tawii e nder daawal balɗe capanɗe tati e jeegom (36) guwarnama liɓraama laabi ɗiɗi (2) woote ittugol e golle walla ɗaɓɓaande goppugol golle, hooreejo leydi o ina waawi, caggal nde diisnii hooreejo asammbele, fusde ɗoon asammbele. So ɗum kewii, woote ina poti yuɓɓineede e nder balɗe capanɗe nay (40) so heewii. Asammbele keso o ina jogii hakke jooɗaade jonte tati (3) caggal nde toɗɗaa nde.
Firo : Bookara Aamadu Bah
