S aaleh wul Hanenna, mawɗo Parti biyeteeɗo Haatem, etinooɗo waɗde kuudetaa ñalnde 28 suwee 2003, kuudetaa jooɓiiɗo pittaali keewɗi (Kolonel Njaayaan, Kumaandaŋ Sal Aamadu mo Ŋoral Gidaala e woɗɓe ɓe …) wagginii laamu koninkooɓe nde hollitaa mbaawka mum, ɓiɗta yimɓe haɗa ɗum en seppude e haalde miijo mum en.
Saaleh Hananna jeyaa ko e ɓurɓe wallitde kuudetaa baɗɗo o. O wiyi wonde ngonka njuɓɓudi luulndo ngo wonaa normaal, sibu RFD fotaani ɗum ardaade walla boom jeyeede heen, sibu yoga e jagge mum ina kalfinaa hannde golle toowɗe e laamu militeer en. O ɗaɓɓi kadi nde golle politik ɗe militeer en njamiraani kaɗetee, sibu, e wiyde makko, wellitaare ina woodi caggal kuudetaa o. Huunde e kaaɗoo haala ina yahdi e haala Ibraahiima Saar e balɗe cakkitiiɗe ɗe, nde o wiyata : « min nanondirnoo ko geddude guwarnama o, kono min teskiima wonde wul Daddah ina wondi e militeeruuji he, caggal amen, tee ina etoo fuuntude min ». Geɗel gootel noon ina foti teskeede : persidaa Haatem, jogiiɗo hilifaaɓe ɗiɗo e guwarnama militeer en so wiyii ina tinndina Daraniiɓe kisal demokaraasi, hol ko woni demokaraasi, fotaani wonde.
Eɗen ciftina tan wonde wul Hananna, nde waɗata kuudetaa mum 2003, diwii yaɓɓude laawol, diwii waɗde seppo ngo yamiraaka, kono o yaltini ko saaruuji e nder mbeddaaji Nuwaasoot, balɗe ɗiɗi, kanuuji ina otta e wuro he, beeli yimɓe kala ina owi, hakkillaaji kala ina ndiwi, yanti heen ko ina wona yimɓe noogaas maayi heen, ko jiidaa e gaañiiɓe.
Ina moƴƴi o faama wonde daraniiɓe gartugol ngonka dagaare e leydi ndi, ndaranaaki tan yo demokaraasi artu, ɓe ndaranii ko yo Muritani his. Sibu so tawii kuudetaaji nattaani, leydi men deeƴataa adaba, sibu kala peewnitiiɗo e goɗɗo o liɓat ɗum, ɗum ɗoon noon, addataa deeƴre e leydi tee so juutii yuumtata ko e kasaara.
