Ñalnde 9 Oktoobar 2008, Jakkaa Ngenndiijo Senegaal jooɗiima nder batu keñoraangu ngam ƴeewtaade “kuugal Saada Njaay”. Saada Njaay ko jaggal Jakka Ngenndiijo, o jeyaa ko wuro Ngijilon. To bannge jiidigal, Maki Sal ko baaɗiiko.
Eɗen ciftora ko Maki Sal wonnoo Kalifu Halifaaɓe haa e lewru suwee rawane nde o samminaa, Haajibu Sumaare lomtii mo, kaŋko o waɗtoyaa Hooreejo Jakkaa. Ko ina tolnoo hikka e hitaande e feƴtere ko kaŋko woni (wonnoo) Horeejo Jakka Ngenndiijo Senegaal. Fayndaare “kuugak Saada Njaay” ko artirde nguurndam Hooreejo Jakka Ngenndiijo e hitaande wootere, wonnoo ko duuɓi joy. Ɗum firtata ko ittude Maki Sal e jappeere hooreyaagal Jakka Ngenndiijo Ndenndaandi Senegaal. Ɗum noon wonaa buleet e leydi hee, ngati Daawuda Soh e Habiib Caam meeɗii ittireede noon e yonta laamu PS e gardagol Abdu Juuf.
Mbele Maki Sal woni ko rewde laawol Idirisa Sek ferananoo ? Heerto PDS riiwii mo gila ñalnde 3 Oktoobar 2008, o nattii wonde Koolaaɗo Kuuɓal hereto ngo, o nattii jooɗaade e jappeere tergal ɗiɗmal hereto ngo caggal Abdullaay Wad.
Ina sikkaa addi ɗee caɗeele ko sabu Jakkaa yiɗiino noddude kala halfinanooɓe golle leydi ndi. Ina heen Karim Wad (ɓiyi Abdullaay Wad), gardiiɗo ANOCI (Tergal Ngenndiwal ngam Yuɓɓo yeewtere Islaam). Ɓadtiiɓe Hooreejo Ndenndaandi ndi njiyri ɗum ko yiytere yiɗde haɓaade fotɓe loowde laawol lomtaare Abdullaay Wad.
Dente heerto PDS puɗɗii hankadi lamndaade yo darnede “Toŋ 2” nder hereto ngo itte. Ko Maki Sal wonnoo ɗuum. Ɓe mbɗti heen yo “nguurndam hooreejo Jakka artier e hitaande wootere”.
Ɓadtiiɓe Abdullaay Wad ɗaɓɓiri Maki Sal yo o ɗekku wonde Hooreejo Jakkaa, goɗɗo mo ɓe ɓuri horsinde waɗtee ɗoon. Ardii hare feewde e Maki Sal ko Duudu Wad (ɓiyi Abdullaay Wad cawndiiɗo); ko kaŋko kadi ardii sete PDS nder Jakkaa too, e Moodu Jaañ Fadaa. Maki Sal salii ɗekkude… omo fadi haa o ittiree doole.
Ko ɗum woni “kuugal Saada Njaay” gootangal ñalnde 9 Oktoobar 2008, keewal terɗe Jakkaa njaɓi ngal. Hooreejo leydi yumtini ngal… Ndeke Maki Sal nattii wonde Hooreejo Jakkaa Ngenndiijo Senegaal. Ɗaminaa ina hebori suɓteede ngam lomtaade Maki Sal ko Aminata Taal, maa Moodu Jaañ Fadaa, maa Joseph Ndong. Ɓee fof ko e terɗe PDS njeyaa, goto heen fof meɗii wonde jaggal laamu. Yo ɓe ndeeno noon ngati dogdu dow huɓeere juutataa.
Aamadu Malal Gey
