Caggal seppo subaka ñalnde 3 suwee 2006, yimɓe kawriti jamma mum ko Arafaat, ngam tawtoreede hiirde nde cate Arafaat e Daarnayiim njuɓɓidini toon. hoohooɓe nokku o e bismaaɓe e kewu o e yimɓe heewɓe tawtoraama hiirde nde. Jirwini nde ko di[ɗe cate ɗiɗi ɗe kam e jabbaaji.
Hooreejo catal Daarnayiim, hono Abdul Sih e hooreejo catal Arafaat, hono Aamadu Malal Jallo mbismiima denndaangal tawtoraaɓe kewu o (jabbaaji 14/18; maayka-goonga e …), haa arti noon e hoɓɓe ɓe kam e naalankooɓe ɓe, yantude e terɗe Yiilirde Ngenndi jeyaaɗe toon (Aamadu Jibeeri Sih e Faatimata Sal) sabu darnde mum en.
NAANGE
- Jeeyatnooɗo ɓuuɓri,
- so naange mutii yo o wantir ;
- Jeeyatnooɗo jomngol,
- so naange fudii, yo o wantir ;
- Naange fuɗii e ngenndi amen,
- gite njiydii,
- jomngol min ngoppii.
- Ngee naange fu[nge,
- Yellitaare magge humpataa
- Gaafe magge, belaaɗo e mettaaɗo,
- junngo wirnataa;
- Ngee naange, paamon noddi ko fedde
- Ɓamtooɓe Pulaar,
- pulaar dimo no dolaar.
- Njaarat-mi ko oo koɗo belo,
- Mo ɓure kecci duuɓi
- ɗo pucci ndogata;
- Njaarat-mi ko oo koɗo belo,
- Momtuɗo gon[i, yoɓi ñamaale.
- Bisimilla ma ba[ɗo mbiy-mi mbiy-mi
- Bisimilla ma guurtinɗo Pinal mbiy-mi
- Bisimilla ma timtimol mbiy-mi
- Darnde ma haa bada ko semmbinteende
- Ko aan huɓɓi Fooyre Ɓamtaare
- Golle jaambareeɓe ma ɓamtu-daa
- Salinooɓe yawaare towɗaa
- Mbaydi kalfaandi
- No diidorinoo, ndiiwtu-ɗaa.
- Ko aan yiyti gannde men ubbanooɗe
- Duɗal humambinnaagal, ñif-ɗaa
- Koongu e majjere, kaɓidaa
- Ndimaagu leñol, compu-ɗaa.
- Mi wontii ele ganndo diƴƴe
- Peerotoo-mi ko e maaje ɓure ma.
- Mi wontii Gelongal ñallaa wullaani
- Senegaal e Muritani ka[taani daande am
- Mi ñallaa, mi jaaynaani golle ma.
- Mi wontii lelel jeeri, gayel ñaaruuje
- Mi ŋabbii e kocce, mi rewii e karaaje
- Mi naatii e saalkeeji
- Mboɗo wallita lewre nde haa lakkitoo.
- So tawii ko nduwotoo mi ko, Alla ena nanana mi;
- So tawii ko naagotoo mi ko, Alla ena jabana mi;
- Yo ɗemngal Pulaar Yellito, haa nannga e kammu.
- Gelongal Fuuta Njaay Saydu Aamadu
Jangtawol : Kajjaa Jallo
