Catal likseyba 1 (Gorgol) hesɗitini yiilirde mum ko ñande 18/06/2004, e dowtawtoreede 172 hesɗitinɓe e rewɓe.
Tuggi suwee 2004 feewde suwee 2006 catal ngal ɓuri daranaade ko jeeyngal e jaŋde e ballondiral e fedde Tiimtimaare Likseyba. Catal ngal fiyii ko fawanoo e mum (yiilirde, e heblo Mawningol hitaande 30 ɓere FƁPM). Ngal tawtoraama golle mawningol fedde nde : Nulaaɗo catal ngal, hono Abuu Aamadu Joob, nde arti Nuwaasoot, waɗii ciimtol golle ɗe; yiilirde ngenndi yettaama heen sanne.
E ooɗoo sahaa ko jaŋde tan woodi e catal he : duɗe 3 janngooɓe pulaar ɓolo, e duɗe 2 wonnande jannguɓe ɗemɗe goɗɗe. Kuɗi e kaadam heɓaama e ballondiral e Maamuudu Demmba Bah e Abuu Umaar Kan.
Lohre ngalu noon ina woodi: alaa fiyooɓe, alaa gattooɓe.. Lohre yoga e fannuuji e nder catal ngal saabii ɗum ko ɗanle huunde e terɗe catal ngal, e lohre woon e terɗe, e waasde dañeede humpitiiɓe, e softuɓe tigi rigi. Kono tan en njawaani ko dañaa ko. Ɓeydi ɗum noon ko yaarlitaare ustaade, jannnguɓe woon tolnooji njaaɓaani wonde kooninkooɓe leñol ngol..
Fooyre Ɓamtaare ko fuɗɗitii ko tonngooɗe 31,32,33 e 34 neldaama e catal he, ene yeeyee, meeɗaa lammbuɗe, njaru mum ene neltiree goomu jaaynde no haanirta nii, tawi leeltaani, e ballondiral et toppitiiɗo njeeyngu ngu, hono Aamadu Aali Sih.
Abuu Hammadi Dem (Hooreejo Catal)
Fooyre Ɓamtaare : So Alla Catal Likseyba ina foti yetteede sibu ko kanngal fof ɓuri tiiɗnaade e bayyingol jaaynde nde : ina yeeyee toon, tee kaalis ina neltiree ko yaacii : ina wallita no feewi, sibu so wonaa noon jaaynde nde dartoto sabu Rakkeende kaalis. Cate keddiiɗe ɗe ina poti ñemmbude ngal.
