Adunaa oo fof mawninii ñalnde 25 noowamburu 2012, ñalngu adunankeewu ngam nattinde leptugol debbo. Hol ko addi ñalgu nguu ?
Teskaama e nder aduna oo, wonde kala ñalawma mo Alla addi, teemedde, teemedde sukaaɓe rewɓe, kam e rewɓe mawɓe ina piyee haa ngaañoo, ñawa heen, maaya, maa kaangee. Won heen ƴeeɓee, ɓee heen mbaree. Ngam haɓde e ɗee lepte bonɗe, Fedde Ngenndiije Denduɗi yamirii, e nanondiral 54/134, ngal 17 desaambar 1999, sosde ñalngu adunankeewu ngam nattinde leptugol debbo. Fedde ndee yamiri leyɗeele aduna ɗee, kam e pelle ɗe ngonaa laamuyankooje nde mawninta jeeyngal mumen e yimɓe ɓee ngam jaaynude tanaaji gonɗi heen ɗii, e daraade laŋ kabanoo riiwtude ɗee lepte ɗe rewɓe leeptetee.
Jooni noon, hol ko addani aduna oo suɓaade 25 noowaamburu ? Ko teskaade to leydi Dominik, hono laamɗo bonɗo gonnooɗo toon hono Rafael Trujilo, warii haa maayi pak hono miñiraaɓe tato rewɓe Mirabal en. Ɗum waɗnoo ko ñalnde 25 noowamburu 1960, tawi ɓeen njiidaani e makko miijo politik addani mo warde ɓe. Ɗum saabii pelle daraniiɗe jojjanɗe rewɓe ndarii mbaɗi oon ñalawma ñalngu haɓde e piggal e baɗe bonɗe fayde e rewɓe. Ñalnde 20 desaambar 1993, batu kuɓtidinngu leyɗeele dentude jaɓi yamiroore ngam nattinde piile (baɗte bonɗe) feewde e rewɓe (yamiroore 48/104).
Mammadu Maamuudu Baal
