Mansa Musaa, laaminooɗo joomaandu Mali e teemadannde sappo e nayaɓere (1400) woni neɗɗo ɓurɗo alɗude e ko anndaa e daartol. Ɗuum wonaa deftere ɓalliftooɗo Afrocantrist hesere jangtii ɗum, alaa, ko jaaynde Ameriknaare wiyeteende Celebrity Networth e kuɗol Brian Warner yaltini ɗum ñalnde 13/10/20012. Ngalu Mansa Musaa, e ko jaaynde ndee feeñnini, ene millee e 400 milyaar. Eɗen ciftina, neɗɗo ɓurɗo alɗude e aduna hee hannde o, Carlos Slim Helu mo Meksik, ngalu mum ko 69 milyaar. Rewi e mum ko Bill Gate cosɗo Microsoft oo, mo ko ɓooyani tan ko kanu wonatnoo hoore limoore, ngalu mum ko 61 milyaar dolaar.
Mansa Musaa wuurno ko tuggude 1280 haa 1337, o laamiima joomaandu Mali duuɓi 25 (1312-1337). E ngaan saanga Joomaandu Mali ene renndini e nder keeri walla les njiimaandi mum leyɗe hannde ganndiraaɗe Mali, Guinee, Guinee Bissau, Niger, Burkina Faso, Cote D’ivoire Gambie Senegal e huunde e Mauritanie. Daartol ene siftora jahgol makko hajju e hitaande 1324.
E ngal ɗanngal o yahdii e yimɓe teemedde njoyo (500) e dimle kaŋŋe. Nde Mansa Musaa yettii Ejipt kañum e sete mum ɓe ndimti e saraaji tiboore (pyramide) hakke balɗe tati. O rokki laamɗo (Sultan) Ejipt 50 000 dinaar, oon bismii mo, luɓi mo hoɗorde (palais) mum, yamiri watuleeɓe mum yo teddin ɓe kanko e yahdiiɓe makko. Ɓe ngoni ɗoon lewbi tati. Hakke e kо ɓe njuppi ɗoon e kaŋŋe, liɓii coggu kannge e nder Misra ko ena wona duuɓi noogaas coggu mum ummitaaki. Nde Mansa Kanka Musaa arti o addori annduɓe heewɓe, gila e seerenɓe diine haa e architect en ; o mahi jamaaji e jumaaji e nder leydi hee won e majji haa jooni ene keddii. Timbuktu wonti saare duɗe e ganndal. Mali wonti joomaandu mawndu, doolnudu e nder aduna he.
Pulaaronline.com
