Maayo woɗeejo (Bahr el-Ahmar) ko geec hakkunde duuɗe, gonɗo hakkunde Afrik rewo e Fuɗnaange cadiiɗo. Wertallo makko ko hedde 450 000 km². Ko e makko wefotooɓe ummoriiɓe worgo e fuɗnaange Asii kam e Oseyaani ndewata so ina njaha Orop. So wonaano kanko ma ɓe taartoo Afrik.
To bannge worgo, Geec oo ina yulyultondiri ko e Geec Inndo rewrude e damal Mandeb (Bab-el-Mandeb) e ɗemngal ndiyam Aden. To bannge rewo o waɗi ko ɗemɗe ɗiɗi tawi ɓilii hakkunde mum en ko jookdu Sinay : bannge hirnaange ko ɗemngal Suyees (jokkondirngal e Mediteraane rewrude e caaɗngol Suyees), bannge fuɗnaange ko ɗemngal Akaba.
Njuuteendi maayo ngoo ina tolnoo e 1 977 km, kono njaajeendi makko alaa ɗo ɓuri 300 km. Kanngo fof e innireede Geec boɗeejo, noordi ndiyam maggo ko baka (bulo) haakewo ɓenndungo. So wonaa sahaaji, mbaalandiri ina heewi rokkudė ndiyam ɗam noordi mboɗeeri seeɗa. Kono, ina sikkaa waɗi mo innireede noon, ko ndeen, e yontaaji ɓooyɗi, worgo wiyetenoo ko mboɗeeri. Won wiyɓe kadi innde ndee ummii ko e innde laamɗo Erythrus. E latin noon, « erythrus » firti ko bodewol.
