En kabriino, e tonngooɗe men ɓennuɗe ɗee, jaltugol deftere Maawiya e lewru feebariyeе 2012. Tiitoonde ndeen deftere ko “ Hol ko danndata aarabeeɓe ”.
Lowe internet ndee ɗoo, hono kassataya.com e taqadoumy.com et for-mauritania.org puɗɗinooma yaltinde heen taƴre, kono muulɓe deftere ndee ngullitiima yo ɓe ndartin ko ɓe njaltinta deftere ndee koo. E nder taƴre nde ɓe njaltini ndee noon, Maawiya haalata heen ko ko faati e ɗemngal Arab. E miijo Maawiyya, caɗeele Aarabeeɓe fof ummorii ko e taƴondiral hakkunde jannguɓe mum e ɓesngu Aarabeeɓe nguu. Sibu, e wiyde makko, nguun ɓesngu ko njoñaangu, sibu mum waawneede huutoraade calti ɗemngal Arab daɗaadi, ɗi mbaawaa nawde ganndal e kesamkesaagu. O joofii ɗoo ko Safatoore e Daarijaaji kaaleteeɗi e nder leyɗe Arab.
Ngam haɓaade ɗuum, feere Maawiyya sakkiti ko juɓɓingol jeeyngal jaajngal jangde mawɓe, tawa ko leyɗe Aarabeeɓe ɗee kala ndokkindiri juuɗe, ndenndina ngalu ngam waɗde ndeen jangde. E miijo makko, e nder duuɓi 10 haa 15 oon kampaañ ina waawi yentinde ko “ rewolisinaaji aarabeeɓe ” ɗii mbaawaa yeñtinde, ɗi alaa ko mbaɗi so wonaa ittude laamɓe, waɗta ɗoon woɗɓе.
Ndeke ko jooni paam-mi ko addaannoo mo umminde “ kampaañ deftere ” e duuɓi cakkitiiɗi gardagol makko dowla Muritani. Eɗen paama tan, ko o wiyata ɗemɗe diiwaaniyankooje e nder deftere makko ndee, joopii ko calti ɗemngal Arab ngal tan. O siftoraani heen boom ɗemɗe keddiiɗe ɗee, ɗemɗe leƴƴi goɗɗi guurduɗi e Aarabeeɓe ɗii, ko wayi no leƴƴi ɓaleeji Afriknaaji, walla Kurde en, walla Tamasigh en (ɗemngal Berɓeer en).
Kono tan eɗen paama, yiɗde makko waawnude kuutoragol kuɓtodinngol Arab fusha oo, e miijo makko ɗeen ɗemɗe kadi poti ko mumteede haa laaɓa. Abdel Asiis kam arii, miijii ko ko luulndii ɗum, sibu e miijo mum, bone Muritani fof ko wonde ɗum “ ɓesngu yimooɓe ”mehɓe… O hollitii hanko o soklaani defte… E miijo Maawiya, addani Aarabeeɓe caɗeele ko woppude ɗemngal mum en, hono Arab fusha oo, e haalde ɗemɗe “colli ” (hasaniya, daarijiya ekn…). Ndaw ko raɓɓiɗi miijo ! ! !
