Hoodere siirtere yulii mbildi to New Jersey, yaltini geɗe nguurndam ummoriiɗe weeyo
Ñalnde 16 sulyee (morso), New Yorknaaɓe kulii no feewi : morlere jaynge seeki asamaan naange e hoore kellew, yani beƴ dow nanndolla Ndimaagu (Statue de la Liberté), kaliti, waɗi eelnaango mawngo. Seeɗa caggal ɗuum, haayre peesoore hedde kiloogaraam yuli mbildi galle gooto to Hillsborough, taƴti mbildi suudu waalordu, taccitii dow leydi. Nde hakkille joom nokku oo arti caggal ndee bettere, o renndini keletine ɗee, o feewniti mbildi huɓeere makko ko adii nde toɓo arata. Ko ɗuum daɗndi jiytal ganndiwal kimmungal.
Duuɓi ɗiɗi caggal ɗuum, caggal nde keletine ɗee njuurnitaa no moƴƴi nder wiiñordu, annduɓe NASA e Duɗal Seti (Seti Institute) caakti tonngi mum en : ndee haayre ko haayre weeyo ɓooynde, waɗnde ƴulɓere « chondrite carbonée » , saɗnde yiyde, aroore e men memtaaki gila e fuɗɗoode yuɓɓo Nnaange, ko ine wona jooni duuɓi milyaaruuji 4 e feƴtere (4,5 miliyaar). Ɓe tawi nder mayre teemedde dijje sicciwere (acides aminés) – hono molle ɗe ɓalli kulle guurɗe kuutortoo ngam feewnude mahɓanɗe (protéines) mum en. Ko ɓuri heewde e dijje cicciwe keewaani walla nii ngoodaani dow Leydi. Ko laaɓani en tan, ɗe ummorii en ko caggal Leydi.
Ɗee molle ummii ko he hoodere siirtere (astéroïde) idannde, sabu ndiyam kaaɗɗam ndogatnooɗam nder kaaƴe gila e puɗfuɗɗi yuɓɓo Naange. Ɗuum ko seede goɗɗo wonde ko koode-ciirte ndokki leydi nde fuɗɗotoo ndee, birikaaji wayliwal katojinaaɗi he peeñgol nguurndam. Eɗen mbaawi wiyde waɗde ko tageefo neldi en koliiji tinndinooji en no nguurndam feewnirtee.
Science Advances,15 sulyee 2026 — SETI Institute / NASA Goddard
Bookara Aamadu Bah
