Etijaaji janngooji to duɗal jaaɓi haaɗtirde Seek Anta Joob Ndakaaru ndetinii pelle mumen e dental gootal ngal ɓe inniri Dental UCAD.
Ngaal Dental na moofti hannde kala suka pullo e nder jookli Afrik janngoowo to duɗal jaaɓi haaɗtirde Ndakaaru. AUPLP, MEEF e pelle goɗɗe etijaai fulɓe janngooɓe, pelle etijaaji diiwaan e gure ceertuɗi nanondirii e wontude fedde wootere. Ndeen fedde nde ɓe innri Dental UCAD ardii ɗum ko Aamadu Soh jeyaaɗo Jolof. Tuugnaade e ɗereeji ɗe ɓe neldi mbiimi, miijo dental ngal jibinaa ko e “ teskuya hannde e aduna ngootaagu kala lawiiɗo ko maayoowo ”. Dental Ucad ina renndini pelle gure e diiwanuuji tawa ko ardiiɓe ɗeen pelle ngoni tawtoroteeɓe e batu Dental. E cate diiwaaniyankooje jaaɓi haaɗtirde to Bambey, Cees e ko nanndi heen eɓe njogii fiɓnde yettaade ɗumen ngam darnude cate diiwaniyaŋkooje. Ko hono noon ɓe njogorii hannde jokkondiral ngal ɓe puɗɗii aawde hakkunde maɓɓe e fedde Kawral janngooɓe to Duɗal Gaston Berger ngal Ndar (rewo Senegaal). Ina jeyaa e paandale maɓɓe feññiŋde pine pulaar e nder nokkuuji tuubakiri e hollirde leñol ngol ko guurngol, ko jaajngol. Ina heen jeyaa kadi wallitde kala suka pullo koɗo e duɗal ngal mo anndaa geɗe ɗee no jahrata haa waawa heƴde e annude laabi waasa wuurde tumaraŋkaagal. E ko Khayri Lih jeyaaɗo Ɓoggel mooftoowo ngalu fedde ndee haali, “ emin ndakki juuɗe e kala baawɗo addude ballal sabu e hitaande aroore ndee eɓɓooje ummanaaɗe ɗee ina mawni ”. E oo sahaa ɓe ngoni ko e ruumo kollirgol Dental ngal e eeraade ɓe cuwaa ɓee naatde mbele ina nootitoo e Dental UCAD.
Hammee LIH,
Lewlewal Group Networks, www.mbiimi.com
