Lewlewal aset 16 duujal 2009, wuro Columbus, dowla Ohio Amerik hoɗtii ñaldi pinal e mawningol jaambareeɓe fulɓe. E njuɓɓudi pulaagu Columbus, ñalɗi ɗii puɗɗorii ko duwawuuji fayde e jaambareeɓe fulɓe suddiiɓe leppi leydi, teskiranooɓe darnde mum en fayde e renndo ngoo hade mum en wirnaade. Ñande aset 16 ndee, hiirde pinal mawnde waɗii e tawtoreede seernaaɓe wuro ngoo, nootitiiɓe gure catiiɗe, naalankooɓe wonɓe e nder leydi he kañum e jaayndiyankooɓe Tele Senegal e gardagol Aicha Guisse gila futuro haa waktuuji 2 sukaba. Ñalɗi ɗi teskaama wonde ɗi gadanol e oo nokku haa yettii ɗo hay sinno pinal ɓooyii jummbeede e Columbus. Ñalɗi ɗii kollitii ko heewi haa arti e famminde wonde renndo ngoo ina heddii e cosaan mum etee mo woni fof ina teddini aadaaji ɗi. Ko anndanoo gila hanki ko wayi no « cabbi aynaaɓe gilɓooji nebam, ɓirduɗe e gude leppi rewɓe fulɓe raneeɓe, danngaaji e tenngaaɗe » ngarii toon kono kadi won ko suuɗinoo ko feeñi toon nde ɓalli nguli : « ndeke won jaaltaaɓe heewɓe heddiiɓe e cosaan hay sinno sikkanooma ko ɓe faayduɓe ndanewu e dollaar ; laanel sammba laakara e werlaa keewɗo Gucci e Louis Vetton« ….
Caggal waktuuji 8 tardo puɗɗagol golle mum en, fulɓe Columbus Ohio mbaɗi ñalɗi mum en pinal ko e tawtoreede arɓe nootaade gila e tuubakooɓe haa e pulaagu ummiingu Baltimore, Atlanta, Cincinnati, Aurora, ekn. E nder ndiin mbaadi naalankaagal wonaani sara e hiirde hee haa arti noon e njimri ganni. Aicha Gisse e goomu mum ɗowii hiirde nde, lawɓe diiwaan oo njimii haa weli, kolli e gitaruuji koɗaama haa ruuki, hay subalɓe ne ngijiima yaltinde ngijiima yaltinde noodi e nder dingiral njoorndi Columbus so Geelel Kumba accaani jammude ɗi Gellaay Aali Faal. Ndeke kala mo ɓanndu mum wuli, cosaan mum yaltat sabu hay Sherif Jah hootii e cosaan tigi. Hiirde ndee fusi ko waktuuji ɗiɗi jemma caggal nde renndo ngoo dañi yeewtude kadi mo woni fof ganndal ngal jogii e pulaagu. Teskaama noon renndo ngoo fuŋŋinii rafi mum nehdi e jonnde nde sabu dille, coow, cotu-cotongel, rafi njuɓɓudi e peeje luurduɗe : mo woni fof e feere mum ; njiyee kam nanee kam haa e yeeso Kameraaji RTS.
Kudol Umaar Tokosel Bah, Baltimoor www.pulaagu.com
