Aysata Muhammad el Kabiiru Jallo nawii raay
Ñande aset 05 kawle (oktoobar= 2024, duɗal Hadaa iqal Quraana to Kayhayɗi waɗii kawgel mum nayaɓiiwel. He ngol laawol yahdunoo hoore boowal ko sukaaɓe ɗiɗo rewɓe, hono Aysata Muhammed Elkabiiru Jallo e Karjatu Dara Siidi Tuure. Yoga e seeremɓe juulnooɓe e jannginooɓe tawtoraama heen, kam e gardiiɗo kalfinaaɗo geɗe lislaam haa e suɓaaɓe nokku oo. Oon kikiiɗe ko nii fuɗɗorii :
Udditirgol aayeeje qur’aana, dokkugol suɓaaɓe nokku oo konngol, konngol
Ceerno Abuu Siraaji Soh Hooreejo Fedde Hadaa iqal Qur’aana. Ko kanko kadi woni ceerno jannginoowo duɗal baɗngal ko inde ɓura 500 suka debbo e gorko. Caggal konngol makko, ko kuccondiral sukaaɓe ɗiɗo rewɓe ɓee he yeeso ñaawooɓe tato, hono Ceerno Tijjaani Sow, Ceerno Mammadu Labba Bah, Ceerno Saara Soh.
Adii jolde ko Karjatu Dara Siidi Tuure. O eelti daande e baar mo woowaaka naneede, teemedde, teemedde neɗɗo ine keɗii mo. Caggal ɗuum Aysata Muhammad Elkabiiru Jallo Joli, he daande wuurnde, yuumtunde, e doortinaango ngo hono mum weeɓaani. Ñaawooɓe ɓee kuccani ɓetde toɓɓe maɓɓe. Konngol ruttii e ɓiɗɗo kayhayɗinaajo tedduɗo, teddinarooɗo kikiiɗe oo. Oon woni Mammadu Jibi Aaw. Mawɗo golle sunnorde cellal wiyeteede L’ONISPA. Oon liɓi konnguɗi teskinɗi, so wiyde jannginooɓe ɓee ko nehooɓe, lomtiiɓe denndaangal jinnaaɓe ; laamu e pelle ɗe ngonaa laamuyankooje ine poti waɗtude hakkillaaji mumen e maɓɓe. Ɓe mballitee ɓe cemmbinee.
Ko caggal konngol makko e konnguɗi yoga e tawtoraaɓe, ñaawooɓe ɓee kuccani feññinde njeñtudi kawgel ngel. Kajjatu Dara Siidi Tuure dañii toɓɓe 7,5 e dow sappo ( 7,5/10), Aysata Muhammed Elkabiiru Jallo dañi ko toɓɓe 9,5 e dow sappo ( 9,5/10 ). Waɗde ko Aysata Jallo nawi raay. Njeenaaje paayodinɗe ndokkaama. Kanko Aysata o rokkaa 6 000 MRU e deftere kaamiilu e seedantaagal. Kanko Karjatu o rokkaa 3 000 MRU e deftere kaamiilu e seedantaagal.
Ciftinen ko ngol woni nayaɓol ko fedde Hadaa iqal Quraana ina yuɓɓina kawgelaaji bayɗi nii. Gadanol ngol wonnoo ko 22 Oktoobar 2017, ɗimmol ko 4 Noowaamburu 2018, tataɓol ko 08 marse 2020. Sukaaɓe njeegomo woɗɓe keɓii seedanteeje, tawi ɓeen ne ko reennooɓe Quraana he nder duuɓi tati lommbiiɗi ɗi Duɗal ngal heɓaani yuɓɓinde pottigal mawngal. Ɓeen ne ko tato rewɓe e tato worɓe. Ɓe ceedtanaama nehdi e coftal e pellital e kala ko ina semmbina duɗal ngal, ɓeen ngoni Seek Umar Maal to Ndakaaru, Alfaa Umar jallo to Gine Konaakiri, Abdurahmaani Alasan Soh to gemmu Muritani, Hawwa Abdullaahi Accee to Kayhayɗi leegal Siñcaan, Habii Yaayaa Tuure Kahayɗi leegal Tulde, Mariyam Yaayaa Njaay Kahayɗi leegal Gurel Saŋe.
Daawuuda Sammba Ndonngo
