Yeewtere nde, ko ganndo mawɗo, hono Sangalde, yeewtata nde, е wondude e jaayndiyanke ŋanaa, ina wiyee Bojel, ko oon waɗi ngardiindi mayre. Tiitoonde yeewtere nde noon ko « Nafoore wonde e puɗi e kuuɓal, e tanaaji dookdi puɗi ɗi, e ko wuuri e majji (sato ngo fof). Bojel bami konngol wiyi :
“ Banndiraaɓe tedduɓe, hannde eɗen mbiya “ maayo waɗii ndiyam ”. Ko ɗum firti ? Ɗuum firti ko won ko heɓaa, ko yiɗaa no feewi, ko soklaa no feewi, ko hatojinaa sanne, woni dañde jokkondirde e ganndo mawɗo, jogiiɗo humpito mawngo, ko feewti e puɗi e kuuɓal. Hay gooto e men haalantaake nafoore puɗi ɗo tolnii. Wonande ɗum, e wonande denndaangal ko foofata, ko woni e duunde nde koɗ-ɗen ndee. Onon ɓuri kam jogaade humpito e ɗuum. Kono haɗataa, mi siftina en heen seeɗa e ngardiindi ndee ɗoo yeewtere, nde nafoore mum alaa ɗo haaɗi e yontaaji, alaa kerol e duulaaji. Mi wiya : »Annduɓe mbiyii yo ganndo men jooɗiiɗo oo yaafo mi. Hakkille ceniiɗo wonata ko ɓalndu seniindu. Hol no ɓalndu seniindu e hakkile ceniiɗo keɓortoo gaa puɗi, sabu ko kañum en ngoni cellal, ko ñaamdu woni cellal. Ko heege woni ñawu, sabu ko kañum wiyetee « Mawngal ñabbuuli ». E ngoon yeeso, miɗo waawi wiyde ko puɗi ngoni nguurndam. Ɗo ɗi ngalaa fof, nguurndam waawataa wonde ɗoon Njaafo-ɗon, mi wiya on ndee ɗoo yeewtere ko dakmunde no feewi sabu nde joofii ko ngonka men, e ndii ɗoo leydi, e nguurndam men, e kisal men. Ko puɗol woni ñaamde men, ko kañum woni njaram men.
Oɗon nganndi ko puɗi ngoni ndiyam, ɗo ɗi ngalaa fof ndiyam alaa ɗoon, wonataa ɗoon, arataa ɗoon. Yeewtere nde ina foti waɗteede hakkille no feewi ; yo nde heɗore hakkillaaji, mbele loowdi mayre ndi ina faamee no haaniri. Yo naamne ngalɗin nde, sabu naamnal ina uddita kaaloowo, haala walla e ooñtude haala mum feewde e geɗe ɗe waawnoo yejjitde maa woomaade tawa ko kotojinaade anndeede e faameede. Oɗon nganndi addani en suɓaade ndee ɗoo tiitoonde Puɗi e nafoore mum en e kuuɓal, e haa teeŋti heen ko abbitii e safaara, ko sabu ko cellal woni afo ngalu, maanaa afo nguurndam, ngati ngalu nguu ɗaɓɓirtee ko haa wuurdee, woni safroree.
En mbiyiino ko ñaamde woni safaara. Mo ñaamaani waawataa sellude. Mo sellaani waawataa yahde ngam yiiloyaade nguura mum ngittateeka e puɗi kaa, hono ɗaɗi, gabbe, potte, ɓiɓɓе, haako, piindi, e ko wonaa ɗee geɗe limtaaɗe giwooje e puɗi nguur-ɗen ɗii. Ko gasgol e doggol, e guurgol, e taƴgol, e ŋegol, e ŋabbugol, e duɓgol keɓata nguura kaa. Anndi mo sellaani kam hattantaa waɗde ɗee ɗoo golle, hattantaa waɗde ɗee ɗoo golle. Ngannden ko e janngude ngon-ɗen. Paamen wonde jannginoowo ko janngeteeɗo, janngoowo ko janngeteeɗo. Mo woni kala yeewetee e mum ko ko waawi ko. Jannginoowo ko dokkoowo. So aɗa rokka noon, yo won ko njogi-ɗaa aɗa rokka ;so ina heewi, ko ndeen dokkal ngal ɓurata heewde. Ko ndeen noon ganndo, e mo anndaa ceerndetee ! Janngooowo ko keɗotooɗo, keɗotooɗo ko naamneteeɗo so heɓii ko rokkaa ko. Keddorinooɗo hakkille oo noon ma heɓ ko rokkaa koo. Kedorinooɗo nofuru tan famɗa ko dañi. Miɗo yaakorii enen kala en paamii. Jooɗodaade e ganndo ko fartaŋŋe mawɗo, wata o welsinde. Ganndo amen, njaafo-ɗaa, haala artii e ma. » (Ko ɗo ngardiindi jaayndiyanke ŋanaa Bojel rowi, rewata heen ko yeewtere ganndo mawɗo o, Sangalde.
Kono ko ma laawol gonngol, e Fooyre Ɓamtaare aroore)
