Mammadu Njobbo Jah Kalfinaaɗo jaŋde Yiilirde Ngenndiire Fedde Ɓamtaare Pulaar he Muritani (FƁPM), jooɗodiima e yiilirde catal FƁPM to Nuwaadiibu, ɗo galle Pulaar Nuwaadibu, jeyi catal ngal.
Ɗum waɗi ko nde kalfinaaɗo jaŋde ari Nuwaadibu e haaju mum keeriido. Mbo jokkondiri e hoyreejo catal ngal, hono Muusaa Bah. Ko he nder ɗuum hoyreejo oo teeŋtini jooɗadogol makko e yiilirde catal ngal, ko idii e mbo ruttoo Nuuwaasoot.
Ina jeyaa e payndaaje Yiilirde ngenndiire FƁPM, kala nde gooto e terɗe mum yahi he nokku ɗo catal walla peŋgal fedde ndee tawetee, yo joomi mum jokkondir e mum en siko tawii ɗum newiima, hay sinno wonaa YNG nuli ɗum.
Joɗnde ndee waɗii e gardagol hoyreejo catal Nuwaadibu ngal, e tawtoreede Koolaaɗo kuuɓal Abdul Gey, Kalfinaaɗo kaalis Mammadu Huudu Jaw, Kalfinaaɗo pinal Liimaan Sammba Jah, Alsan Sal, e Aamadu Kebe. Joɗnde ndee fuɗɗiima ko idii juulal futuru, nde joofi ko juulal geeƴe.
Caggal bismaago, ko ganndondiral koɗo oo e yiilirde catal ngal. En tawii ɗoon duɗal he ngal waɗi tolnooji ɗiɗi, gadano e ɗiɗmo. ITolno 1 oo ine jannga ñalnde altine kala, tuggi waktuuji 17 kiikiiɗe haa waktuuji 20. Tolno 2 ine jannga alarba kala, tuggi futuro haa geeƴe. Jannginta ɓe ko Abdul Gey koolaaɗo kuuɓal e Liimaan Sammba Jah kalfinaaɗo pinal. Ko kañum en ɗiɗo lomlomtondirta he tolnooji ɗii. Naamne e jaabawuuji mbaɗii hakkunde kalfinaaɗo jaŋde ngenndi e yiilirde catal ngal, haa teeŋti e fannu jaŋde. Caggal ɗuum ko ittondiral kumpa e ɗo golle FƁPM njahrata e oo ɗoo sahaa… Eɓe ñaagii nde YNG waasata ɗum en wayru. Wasiya teeŋtuɗo waɗii… Ko nii woni joɗnde ndee jofii he dow teddungal e weltaare saɗne…
Mammadu Njobbo Jah
kalfinaaɗo jaŋde ngenndi
