So tawii ina wiyee wonde waɗnoo Siidi wul Seek Abdallaahi nomde Abdel Asiis e Gaswaani e Negrii seneraal ko yiɗde ruppaade bone mum en, huunde nde daɗndaani mo ; ina gasa tawa Abdel Asiis ne ko hono ɗuum faanditii heen, so welnaade ofiseeji mawɗi ɗii.
Waɗi en wiyde noon, ko o nomii senerooji 9 tuggi nde o heɓti laamu faade hannde. Wattindiiɓe ɓee nomaa ko ñalnde alkamiisa 21 marse 2013; ɓeen ngoni : Hanaana wul Siidi wul Hanaana, koroowo konu kuuɓtodinɗo e Ahmed Bammba wul Baaya, Waali Tiris Semmuur e Ahmed wul Ahmed Aysa jeyaaɗo e sanndarmori, e Sultaan wul Sawuud meeɗnooɗo wonde hooreejo ekkol sanndarmori to Rooso. Hade ɗuum, e hitaande 2009, o nomiino Njaga Jeŋ e Wul Meget e wul Bekriin e Wul Haadi e wul Sanaagi, senerooji. E hitaande 2011 o ɓeydi heen Miskaaru, o reftini heen e hitaande 2012 ndee, Jah Aadama e Dah wul Maamy (gardiiɗo duwaan) e Muhammed wul Reggaani wul Siidi Ahmed. Hannde konu Muritani ina yahra e senerooji 16.
