Hannde 20/01/2017, Donald TRUMP, laamɗo keso Dowlaaji Amerik Dentuɗi ƴettata golle. Ɗum noon, kolliten banndiraaɓe ɓee, holi kanko.
Donald Trump
Donald Trump, jibinaa ko ñalnde 14 sulyee 1946 to New York. Ko o julanke mawɗo. Kanko wonata hoorejo 45ɓo Dental Dowlaaji Amerik caggal nde « wootooɓe mawɓe » teeŋtini ɗum nder woote mum en ñalnde 19 desaambar 2016. O ƴettoyta golle ko ñalnde 20 saawiyee 2017. Ko o taanum wiyeteeɓe Frederick Trump e Elizabeth Christ Trump, ummoriiɓe Almaañ. Baaba makko wiyetee ko Fred Trump, ko golloowo e ndiiñiindi (immobilier), coso gollirde wiyeteende Elizabeth Trump & Son ɗo o gollotoo gila omo woni sanɗa njulaagu to jaaɓihaaɗtirde Pennsylvanie. Nde o joofni jaŋde o heɓti gardagol gollirde ndee, o innitiri ɗum “The Trump Organization”. Ko e ɗeen golle o mahi dañal makko e innde makko kam e kuɓeeje mawɗe ɗe yoga e mum ngoni nder New York, ko wayi no Trump Tower. O golliima kadi e teleeji hakkunde 2004 e 2015. O mahi TRUMP Tower ko e hitaande 1983. Oon sahaa kayre wonnoo hoɗorde ɓurnde mawnude e winndere ndee. O mahii goɗɗe caggal ɗuum : Trump Tower to Chicago e 2009, Trump Palace Condominiums to New York, Trump Taj Mahal to Atlantic City, Trump Las Vegas. Omo yiɗnoo mahtaade kuɓeeje World Trade Center ɗe ownooɓe njandinnoo ñalnde 11 settaambar 2001.
Kono daraja ɓuri iwrude mo ko e deftere nde o winndunoo e hitaande 1987 tiitoriinde Trump: The Art of the Deal, ɗo o hollitta hoore makko, nde nganndu-ɗaa duuɓi 13 woni hoore defte ɓurɗe horsineede. O yeyii e mayre miliyoŋ tumbitere.
E kitaale 1990 o feeñii e filmuuji simemaa keewɗi, ko wayi no Maman, j’ai encore raté l’avion, Ghosts Can’t Do It, Les Chenapans, kam e filmuuji tele, yeru Le Prince de Bel-Air, Une nounou d’enfer, Sex and the City. Tuggi 2004 noon o wonii jirwinoowo teleeji, yeru omo joginoo yeewtere wiyeteende The Apprentice nde nganndu-ɗaa heɓii daraja mawɗo e leydi hee, sabu makko wonde neɗɗo jalnoowo. Itti mo heen ko gongol makko kanndidaa e woote garwaniije hooreleydaagu.
E hitaande 2005 o sosi duɗal toowngal heblo ko faati e ndiiñiindi. Ngaal duɗal golliima haa 2010, kono huunde e sanɗaaji mum ko nawɓe mo ñaawoore e hitaande 2013 ( Ñalnde 18/11/2016 o fellitii yoɓɗe 25 miliyoŋ dolaar ngam maslahaa mo o wiynoo o jaɓataa abada nde o yiylotoo laamu ndee.) Oon doosiyee jeyanoo ko e doosiyeeji makko keewɗi dogooji ɗi nguddaaka tawa (ina wiyee ɗi njettiima 75), ɗi o waawi noddireede ñaawoore ɗoo e makko jooɗaade e jappeere laamu hee.
TRUMP ina horsini fijirde wiyeteende GOLF nde o ardii walla o yuɓɓini kewuuji mum keewɗi, o jogii heen boowe keewɗe, o faggii heen kadi jawdi keewndi. Innde TRUMP ndee e hoore mum ko innde njulaagu (marque) latiiji, karwatuuji, matelaaji ekn, jibinannde mo ngalu njonngu, sibu, e hitaande 2014 ndee tan, o dañii heen fotde miliyoŋaaji sappo dolaar njoldi. Jaaynde Forbes millii ngalu makko, e hitaande 2015 ndee, e 4,5 miliyaar dolaar, woni 113ɓo e nder ameriknaaɓe ɓurɓe alɗude.
To bannge politik, o idorii ko wonde demokaraat hade makko reftaade Ronald Reagan e naatde tigi rigi politik e hitaande 1987. Daraja makko to binndol defte addanii mo miijaade yahdude e Oprah Winfrey e woote garwaniije heerto Ripobilikee en e hitaande 1988, kono, ndeen, ko George H. W. Bush fooli. O yalti parti oo e hitaande 1999, o fayi e partiyel goɗngel ngam etaade birgirde toon laamu e hitaande 2000, kono o haayti sibu ɓeeyno rokki mo tan ko 7% e woote gardagol leydi so mbaɗii. Hakkunde 2001 e 2009 (e laamu Bush mo o luulndinoo) o faati e Demokaraat en kadi. E hitaande 2008 ndee, omo jeyaa e difiiɓe kampaañ Hilari Clinton. E hitaande 2009 o ruttii e Ripobilik en… E 2012, o walliti Mitt Romney… Ñalnde 16 suwee 2015 o saakti yiɗde makko fooɗanaade laamu ngam « Make America Great Again! » woni “Ndokkiten Amerik mawneeki mum kadi”, konngol ngol Ronald Reagan huutorinoo. O fuɗɗorii kampaañ makko ko haala kaaɓniika, haala ooyoowo, mo yiɗaa hoɓɓe e leydi mum, e takkude laamu Meksik neldude warkoyeeɓe e Dental Leyɗe Amerik walla haalde rewɓe konngi coofɗi, maa wiyde ina uddana juulɓe keeri Amerik. O innitorii daɗndoowo Amerik e deestaare sabu wonde ardiiɓe ɗum ɓee yimɓe yeenaaɓe e ñiŋde sifaa no woote mbaɗirtee e Amerik nii e wiyde ko woote ɗe tuugaaki e nuunɗal.
Ɗoo, eɗen mbaawi wiyde ma a taw o haalii goonga, “wonde woote Amerik ngonaa nuunɗuɗe”, sibu ko kanko hawi kono Hilari Clinton ina ɓuri mo daaɗe 638 750. Ko e Amerik tan ko wayi nii yiyetee, ɓurde heewde daaɗe kono hawee. Ko wayi nii alaa nde meeɗi waɗde so wonaa e kitaale 1824, 1876, 1888 e 2000. Caggal Ronald Reagan (duuɓi 73 e woote 1984), ko Donald Trump (duuɓi 70) e Hilari Clinton (duuɓi 69) ngoni kanndidaaji ɓurɗi heewde duuɓi e woote gardagol Amerik. TRUMP woni ɓurɗo heewde duuɓi mo Ameriknaaɓe toɗɗii e manndaa gadano yo ardo Amerik. Ñalnde 13 noowammbar 2016 o habrii wonde o yaafiima njoɓdi makko hooreejo leydi (400 000 dolaar hitaande kala), kono laawol ina waɗɗini e makko jaɓde dolaar gooto.
Bookara Aamadu Bah
