Ñalnde 23 marse 2015, Dillere noddirteende IRA renndinii fotde 200 haa 300 neɗɗo, rewɓe e worɓe, sukaaɓe e mawɓe, e yeeso damal Jaagorde Ñaawooje e nder Nuwaasot ngam jambitde goppitgol Biraama, Jibi Soh e denndaangal ɓe ɓeen cokdanoo.
Tuggude waktu sappaɓo haa sappo e ɗiɗo ko ɗoon ɓe njoggini, eɓe ngondi e magaafonuuji maɓɓe, eɓe tilloo daaɗe : ndimaagu ! ndimaagu !… Yo Biraama e Jibi Soh e wondiiɓe mum en ngoppite ko ɓuri yaawde e ko aldaa e sarɗi ! Waɗnooɓe ko boni e waɗooɓe bone ɓee nana ñaaƴa e boli, paaynaaka !
Ko ɗoon gooto e maɓɓe kamɓe seppatnooɓe ɓee wiyi : « laamu nguu ko ko sukki noppi ena salii nande ko min kaalata koo kono so sokaaɓe ɓee ena lutti e kasoo, IRA luttat e mbedda. Ko min haalooɓe min ndeƴƴataa, ko min seppooɓe min ndartintaa » En nganndi nde Biraama e wondiiɓe mum nde ñaawanoo Rooso, cokoyaa ko Eeleega. E dumunnaaji cakkitiiɗi ɗii Jibi Soh rafaa toon, artiraa e Nuwaasot ngam ɓadtaade cafrirɗe. Gila ndeen hay so omo safree ne ko o cokaaɗo tawo.
Njaay Saydu Aamadu
