Oon galle mo sukaaɓe feertuɓe, wuuri ko to Londres (Angalteer). Ɓe ɓurii kala ko meeɗnoo yiyeede to bannge lawɗugol nder jaŋde. He leydi ɓe nguuri ndii, almudɓe keewi heɓirde bakkaa (Baccalauréat) ko duuɓi 17 fayi 18. Kono sahaa fof almudɓe lawɗuɓe, ɓe ndañaani ɗiin duuɓi ine peeña, keɓra bakkaa ko adii ɗiin duuɓi. Yeru, to Farayse, he ndeeɗoo hitaande, ko cukalel dewel jahrowel e duuɓi jeenay (9) fat ari waɗde bakkaa. Ngel yiƴƴi ko he Paula e Peter Imafidon, njeyakon he galle mo kaal-ɗen oo, keɓkon seedantaagal mum en biyeteengal General Certificate of Secondary Education, woni bakkaa, tee kadi ko e fannu hiisiwal. Nde tawnoo wonaa kamɓe ɗiɗo puɗɗi ɗum he galle hee, en nganndii wonaa mehre : galle oo ko galle feertuɓe, mo geno loowi ƴoƴre. Ndutto-ɗen heen seeɗa.
Ɗuum fuɗɗii ko e hitaande 2009, nde funeeɓe ɓee, Paula e Peter Imafidon ɓenni he kawgel hiisiwal duɗal jaaɓi-haaɗtirde Cambridge. Haaɗaani ɗoon, sibu ko noon ɓe mbayi he fannuuji nguurndam goɗɗi ɗii. Peter ko mbir dogdu 4×100 m e 4×400 m, tee teeɗanii ko wonde hooreejo leydi. Paula kañum ko mbir fuku rugby, tee yiɗi ko wonde jannginoowo hiisiwal. So tawii ɗum ne jaggi yimɓe ɓee kaawis, ɗum haawaani ɓee sukaaɓe, sibu ɓe njaɓɓi ko he teppe mawniraaɓe maɓɓe.
Mawniiɓe biyeteeɗo Anne-Marie oo ine haala ɗemɗe jeegom, kadi heɓri bakkaa mum ko duuɓi 10, masteer mum to jaaɓi-haaɗtirde Oxford ko duuɓi 17. Mawniraaɗo biyeteeɗo Christiana oo, jahroowo e duuɓi 22, naatiri jaaɓi-haaɗtirde ko duuɓi 11 ; hannde ko doktoor he hiisiwal to Oxford. Tataɓo galle oo, hono Samantha, heɓii bakkaaji ɗiɗi laawol gootol e hitaande 2005. Oon sahaa kanko ɓurnoo famɗude heen duuɓi. Ko kanko boom rewindii jaŋde miñiraaɓe makko heddiiɓe ɓee, o semmbini ɗum en « naatde e ganndiwal, e karallaagal, e aasiñoraagal e hiisiwal, sibu annduɓe he ɗii fannuuji ine ŋakki ».
Lawɗugol e feɗɗitaare he jaŋde heewaani jaasde duuɓi 12 haa 13 so lawɗii no feewi. Arde haa duuɓi 9, ɗuum ko hikka tan yiyaa he yeruuji dokkaaɗi dow ɗii. Mbele maa sukaaɓe lawɗu haa mbaɗta waɗirde bakkaa duuɓi 7 ? Annduɓe njuurniima ɗuum : « ngaandi neɗɗo timmata ko he duuɓi 6 haa 7 ; ko he ɗii duuɓi ngaanndi cukalel tolnotoo he ngaanndi kellifaaɗo ». Ko adii ɗuum « ngaanndi gasaani tawo mahaade, cukalal ine ŋakkiraa tawo won ɗeen kattanɗe, yeru, so ine winnda B weñcita ɗum, walla winndira nano e ñaamo fof ».
Bookara Aamadu Bah, Ƴoogaa ko he internet
on mbeltanaama yoo Alla selli doole
Ɗum no ŋalɗini to tawata ko galle fof mariri nii hakkillaaji