Altine 7 kawle (oktoobar) 2024, duɗe gadane jaŋde nder ɗemɗe ngenndiije pulaar, sooninke e wolof, udditii. Kañje fof ko ɗe 25 duɗal cariiɗe he nder leydi hee. Heen duɗe 18 ko haalooɓe ɗemɗe ɓee njanngirta heen ɗemɗe mum en neeniije (waɗde mbiyen duɗe ɗemɗe neeniije, ko heewi tonngireede Ɗ1) : duɗe 6 he pulaar, 6 he sooninke e 6 he wolof. Heen duɗe jeeɗiɗi (7) (3 he pulaar, 2 he sooninke e 2 he wolof) mbaɗanaa ko ɓe kumpitaaki ɗemɗe ɗee, woni ko innir-ɗen duɗe lohotooɓe. Ƴeew alluwal les ngal.
Halfinaa ɗowde ndee jaŋde ko Duɗal Ɓamtaare e Jaŋde Ɗemɗe Ngenndiije, hono Institut pour la Promotion et l’Enseignement des Langues Nationales (IPELAN). Duɗe udditaaɗe hikka ɗee ko duɗe ƴeewndorɗe. Jannginooɓe he duɗe ɗee keblaama tuggi jolal (noowammbar) 2023 haa korse (suweŋ) 2024. Gooto he maɓɓe kala, ñalawma udditgol ekkolaaji ngol tawi ɗum ko he duɗal mum. Duɗe ɗemɗe neeniije ɗee njanngata ko waktuuji 24 yontere kala : heen waktuuji 13 ko he ɗemngal neeniwal (jaŋde fannuuji), waktuuji 9 ko arab e diine. Ipelan heblii defte janngirɗe ɗee fof : defte taro, defte hiisiwal wondude e ɗereeji heblo binndanɗe hiisa, nokɓetiwal (soometiri) ɓetirɗe, ɗowirɗe taro wonande ɗemngal neeniwal e wonande lohotooɓe, defte binndol…
Heewɓe noon ine naamndoo hol ko haɗi jannginooɓe heblaaɓe he nder FƁPM ƴetteede ngam jannginde he ɗee duɗe ? Mbele duɗe udditaaɗe jooni ɗee pamɗaani ? Mbele ƴeewndo ngoo ine fotnoo waɗeede ɓayri waɗanooma ndeen, tee seedtaama moƴƴii ? Hol nde jaŋde ndee huuɓtodintee he duɗe laamu ɗee ? Eɗen etoo jaabaade ɗee naamne gootal-gootal.
Hol ko haɗi jannginooɓe FƁPM hebli ɓee ƴetteede ?
Ko adii fof, laamu halfini golle ɗee ko Ipelan, wasiyii ɗum yo tuugo he ko Duɗal Ɗemɗe ngenndiije gadanal (ILN) ngal gollinoo koo, wallinoroo kadi jagge gollinooɗe he ngaal duɗal. Ngaal duɗal (ILN) ƴettunoo oon sahaa ko janngintunooɓe he duɗe laamu, hebli ɗum en, neldi ɗum en yo jannginoy he duɗe mum ƴeewndorɗe ɗee (ko nanndi e Aamadu Seydi Jiggo, Mbay Mammadu, Njaay Saydu Aamadu, Abdullaay Haaruuna ekn.) Ngol ɗoo kadi, ko noon Ipelan waɗiri, ƴetti ko jannginooɓe he duɗe laamu. Ine faamnii, sibu heblude ɓeeɗoo ɓuri newaade e yahdude he golle ummanaaɗe ɗee. Jannginooɓe heblaaɓe he pelle ɗee (haa arti noon he FƁPM) kebliraa ko jannginde mawɓe, woni jannginde ɓe taro e binndol e hiisa (kiisorɗe 4 ɗee). Yoga e maɓɓe kumpitaaki fannuuji gannde keddiiɗe ɗee (guurɗiwal, ganndal leydi ekn.) Tee karallaagal jaŋde mawɓe ine seerti e karallaagal jaŋde sukaaɓe. E oo sahaa, FƁPM ine udditi duɗe fannuuji ngam heblude heen jannginooɓe mum he fannuuji ɗii, mbele janngo e jam, so laamu ummaniima waɗde kawgel ngam ƴettude jannginooɓe, aɓe mbaawa naatde heen…
Mbele duɗe udditaaɗe jooni ɗee pamɗaani ?
Duɗe udditaaɗe jooni ɗee ko seeɗa kay, kono, nde tawnoo ko he yeeso ƴeewndo ɗe udditiraa, eɗen mbaawi wiyde famɗaani. Duɗal Ɗemɗe Ngenndiije gadanal ngal fuɗɗorinoo kañum ko duɗe 4 nder heen ɗemngal kala, hawri duɗe 12. Hay Dallinannde pelle ɗee, ko wasiyii koo woɗɗaani ɗoon, sibu wasiyii ko he ƴeewndo adano ngoo (prétest) hoto ɓur duɗe 10 (hakkunde 5 e 10), caggal ɗum ƴeewndee nder duɗe 40 haa 50.
Mbele ƴeewndo ngoo ine fotnoo waɗteede ɓayri waɗanooma ndeen, tee seedtaama moƴƴii ?
Ƴewndo ngo ILN waɗnoo hakkunde 1982 e 1988, ɓetaama he cili keewɗi, haa arti noon he 1982 e 1984 (Breida Unesco) e 1988 (Jaagordu Jaŋde e Nehdi Muritani). Ɗii ɓetooji kala ine kawri wonde ƴeewndo ngoo yuumtii, tee jaŋde ndee ine haandi e huɓtodineede. Ɗum noon, he miijo men, fotnoo wonde tan ko keblugol huuɓtodingol jaŋde ɗemɗe ngenndiije ɗee nder duɗe laamu, he nder mudda mo ɓurataa duuɓi ɗiɗi. Ɗuum ne ko ƴeewtaade duttorɗe duɗal ngal, hesɗitinde ɗum en haa njahda e yonta jooni kaa, sibu ko heewi wayliima he daawal hakkunde ngal (1988 faade 2024 ko duuɓi 36), gila to bannge loowdi defte, haa e karalle jaŋde, haa e jolgol geɗe kese (yeru karalle kese)… E oo sahaa ko ɗuum pelle ɗee ndaranii, mbele ƴeewndo ngo laamu felliti ngoo, ine waasa diwde duuɓi 2, so heewii duuɓi 3. Ɗuum kadi ine ɗaɓɓi darnde ɓesngu nguu, ngu nootoroo doole ko fuɗɗaa koo, ngu daroo ngam naamnaade hoto ƴeewndo ngoo ɓur duuɓi 2. Jaŋde woodnde hannde ndee (ɗemɗiɗaagu Farayse-Arab) alanaa sukaaɓe men hay ɓural gootal. Ɗum ine feeñi haa laaɓti he kawgel bakkaa, sibu njeñtudi ine famɗi haa ɓurti, ellee jaŋde alaa. Eɗen nganndi kadi ko ɓuri heewde e jannginooɓe duɗe leslese ɗee, ine leefi no feewi he ɗemngal farayse : ko kamɓe fof poti adaade weltaade, sibu maa ɓe mbaɗtu jannginirde ɗemɗe ɗe ɓe kumpitii, almuɓɓe maɓɓe kadi mbaɗta faamde ko ɓe njannginta ɗum en koo. Bookara Aamadu Bah
