Mi janngii no moƴƴi winndannde Tokkaa Jagana, porfesoor mawɗo, tiitoriinde “Ɗemngal, pinal e ƴellitaare : yirlaade nder ngaanumma jaŋde nder Muritani”.
Ndaw ko haawnii. Ko kaa haala duketee he nder Muritani ɗii duuɓi ɓennuɗi koo fof, ko jooni kumpittoo-mi miijo porfesoor. Caggal nde tar-mi winndannde makko ndee kadi, ngon-mi e ƴeewde hol nde nde winndaa, alla e dalillaaji makko ɗii nanndude mi e dalillaaji ɓooyɗi, sahaa nde ɗemɗe ngenndiije kaandinanoo tan e naalankaagal, nder mbayliigaaji jaŋde leydi ndii.
Waɗi en wiyde noon, ko he hitaande 1979, Goomu Koninkeewu Kisal Ngenndi (CMSN) dañiino jaambaraagal lelnude mbayliigu jaŋde, holliti heen yiɗde naatnude ɗemɗe men ngenndiije ɗee fof nder jaŋde leydi ndii. Oon politik yuumti e cosgol Duɗal Ɗemɗe Ngenndiije (ILN) kalfinanoongal heblude naatnugol ɗemɗe ngenndiije ɗee fof nder ekkolaaji, e udditande ɗum en damal laawɗingol. Kanngal fof e famɗude ko rokkaa e ngalu, njeñtudi ƴeewndagol maggal tawaama ine yuumti, fawaade e ɓetooji Breda/Unesco (1984) e ɓeto Jaagordu Jaŋde (1988), bagginnooɗi jaajtingol ndeen jaŋde he denndaangal ekkolaaji leydi ndii.
Porfesoor ine majjirii nii fof ngoon humpito ? Omo anndunoo kam elewaaji naatnooɗi he ndeen jaŋde, ɓurnoo feɗɗitaade fof ko he fannuuji ganndiwal ɗii ? Omo anndunoo kam won he maɓɓe hannde, ko annduɓe mawɓe nder fannuuji baaɗi no selliwal, enformatik, walla ciyniwal (ingénierie) ; won he maɓɓe kadi mbaawii ɓennude he nder jaŋde mum en toownde to leyɗe goɗɗe, won heen boom to Dowlaaji Dentuɗi, ɗo o woni kanko e hoore makko hannde ɗoo ? Porfesoor maa haawe so annduno, gila 1987-1988, ɓee almuɓɓe, caggal nde njanngi farayse duuɓi ɗiɗi fat, ɓurnoo yoga e rewrunooɓe duɗe gaadoraaɗe ɗee, janngunooɓe farayse duuɓi njeegom, waawde farayse.
Dalillaaji ɗi porfesoor rokki ɗii ɓuri teeŋtinde ko ƴellitaare faggudu, margol ganndiwal e karalle, gollingol e kuccam cukaagu. Ko ɗuum taganta-mi, he jaabtawol am, tuugnaade he cakkitooje Unesco, duttorgal winndere ndee ko faati he pinal e ganndiwal, kam he ɗe Booñ winndere (banke moñnjaal), mo woorotaako to bannge politikaaji faggudu e ɗemɗiwal. Mi yejjitaani miijooji haralleeɓe jaŋde, kam e humpito Duɗal ɗemɗe ngenndiije alɗungo hakkunde 1979 e 1999, ngo heewɓe kumpitaaki.
Ƴellitaare faggudu, ɗemɗe hakkunde leyɗe, ganndiwe e karalle
Miijo wiyoowo wonde jaŋde ɗemɗe ngenndiije maa selnu ngaluuji men, haɗa ɗum en huutoreede he ɓamtaare faggudu, he miijo am, wonaa miijo sellungo. Wiɗtooji Unesco e juɓɓule goɗɗe mbaɗi, ine kollita wonde janngirgol ɗemngal neeniwal ine ɓamta no moƴƴi jaŋde sukaaɓe, haa teeŋti noon he duuɓi gadani ɗii. So almuɓɓe ine paama ɗemngal njannginirtee ngal, ko ndeen ɓe ɓurata yaawde heɓde kattanɗe diiñorɗe baaɗe no taro e hiisiwal. Ɗum ɗoon noon ine wallita, caggal ɗuum, jaŋde fannuuji ɓurɗi tiiɗde, ine heen ɗemɗe koɗe e GKCH (Ganndiwe, Karalle, Ciyniwal e Hiisiwal). Humpito men laaɓngo ine teeŋtini ɗum, hono humpito ILN.
Hono no Booñ Winndere wiyri nii (Haut et fort : Enseigner aux enfants dans une langue qu’ils utilisent et comprennent), jaŋde he nder ɗemngal ngal sukaaɓe paamata, ine himmi no feewi ngam galɗingol ekko, e ɓeydugol nuunɗal nder jaŋde.
Jaŋde ɗemɗe ngenndiije haɗataa ngalu huutoreede he ɓamtaare faggudu, kadi wallitta boom ko mahngo ngooroondi tiiɗndi ngam paggagol kattanɗe ceeɓɗe nder ganndiwe e karalle. Ɗemɗe mawɗe ɗee maa naatnire doge-doge, caggal nde sukaaɓe ɓee ndañi diiñorɗe tiiɗɗe nder ɗemɗe mum en neeniije (hitaande ɗimmere jaŋde lesre wonande farayse, e hitaande adannde kolees wonande engele, he nder mbayliigu ngonaangu nguu).
Ɗemɗe ngenndiije e juɓɓule jaŋde
Ko goonga, ɗemɗe ngenndiije ine katojini he kelmeendi karalleeri e kaɓirɗe jaŋde cuɓtaaɗe ngam janngireede karalle. Kono ɗuum dagnataa kaaytugol naatnude ɗemɗe ngenndiije ɗee he nder tippudi nehdi e jaŋde ndii. Humpito leyɗe goɗɗe, baaɗe no Mali e Ecopi ine hollita wonde ƴellitgol kelmeendi ganndiwal he nder ɗemɗe ngenndiije, ine aaɓnoo tigi so wondii e pellital politik e baɗgol ngalu he fannuuji cuɓtaaɗi.
Duɗal Ɗemɗe Ngenndiije Muritani nawrii geɗe ɗee yeeso no moƴƴi, sibu tafanii ɗemɗe ngenndiije ɗee kaɓirɗe jaŋde. Duɗe goɗɗe baaɗe noon he nder leyɗe goɗɗe, kañum en mbaawii sosde keɓe ɗemɗiwe wonande fannuuji ganndal luggi.
Binndanɗe e defte hiisiwal toowɗe, he ɓalliwal, he guurɗiwal, fittiwal, renndiwal, selliwal, coñcewal ekn. ine ngoodi gila e jooni nder ɗemɗe men ngenndiije ɗee. Yanti heen, heblo jannginooɓe ine waawi waɗireede doge-doge, hono no haralleeɓe jaŋde mbasiyirii ɗum nii. Ɗum noon, ɗum fotaani wonde hujja leeltingol naatnugol ɗemɗe ngenndiije nder jaŋde, ngol alaa happu.
Baɗte mum he sukaaɓe muritani
Miijo wiyoowo wonde jaŋde ɗemɗe ngenndiije wallittaa sukaaɓe Muritani, sibu maa selnu ngaluuji, haɗa ɗum en huutoreede he ɓamtaare faggudu, he miijo am kadi, ko miijo huyfiɗngo. Ngo feññinaani jilɓugol ƴellitaare jaŋde. Wiɗtooji keewɗi, haa teeŋti noon e wiɗtooji ɗi fittiyeeɓe jaŋde mbaɗi, ine kollita wonde janngirgol ɗemngal neeniwal ine ɓeyda hoolaare janngooɓe ɓee, ɓeyda kattanɗe mum en waawde marde ɗemɗe koɗe, caggal ɗuum.
Unesco wasiyiima jaŋde ɗemɗe keewɗe gila ko ɓooyi, tawa ande fuɗɗoroo ɗemngal neeniwal hade ɗemɗe mawɗe naatnireede heen doge-doge. Tawaama ndee feere ine yahdi he ngonkaaji baaɗi nii, yeru to Bangladesh e to Ganaa, ɗo almuɓɓe janngooɓe ɗemɗe ɗiɗi walla ko ɓuri ɗoon ndañi heen njeñtudi ɓurndi moƴƴude, ɓuri kadi heɓindaade kattanɗe karallaagal katojinaaɗe he golle nder winndere ndee.
He Muritani, jaŋde ɗemɗe ngenndiije wonaa huunde hulɓiniinde, kono ine waawi yiyreede no ŋabbirgal faade he kattanɗe kuuɓtodinɗe nii. Waawde ɗemɗe ngenndiije ine wallita kadi sukaaɓe ɓee jotondirde no moƴƴi he renndo mum en, tawa kadi ine udditanii ko heddii e aduna oo. Ɗum fof noon fawii ko he kellifuya, e nuunɗal, e pellital fewjooɓe politik ɓee, ngam yettaade njeñtudi cabbaandi ndii.
Yiyannde paandaale ɗemngal e ƴellitaare, siynotoonde
Miijo wiyoowo yo yimɓe hakindo, tawa ɗemɗe ngenndiije kaaɗnetee tan ko he geɗe pinal, ngoon miijo ko haɗoowo ɗemɗe ngenndiije huutoreede nder jaŋde. Ndaa noon, wiɗtooji Booñ Winndere kam e ƴeewndooji goɗɗi baɗaaɗi nder leyɗe keewɗe, kañum en fof kaali ko ko luulndii ɗuum, mbiyi ko ɗemɗe ngenndiije potaani haaɗtineede tan he geɗe pinal, kono ine poti huutoreede nder jaŋde denndaangal fannuuji, hay he GKCH (Ganndiwe, Karalle, Ciyniwal e Hiisiwal).
Naatnirgol ɗemɗe ngenndiije doge-doge, no haralleeɓe mbasiyirii ɗum nii, tawi ko he ballal laamu e wondude e ngalu katojinaangu, luurondiraani e paandaale ƴellitaare. Ko nii boom moƴƴinta jaŋde ndee, nde wona huɓtodinnde, nde ɗawaani hay gooto, wallitoore heɓtaade leyɗe ƴellitiiɗe to bannge faggudu.
Yiyannde waawrunde, duumotoonde
Tonngol winndannde ndee (winndannde Tokkaa ndee) tuugnii ko he luurdingol ngol haanaani hakkunde kisal ɗemɗe e ƴellitaare faggudu. Ndaa noon geɗe ɗiɗi ɗee luurondiraani. Ƴeewndooji baɗaaɗi he leyɗe goɗɗe ɗee fof kolliti ko jaŋde ɗemɗe ngenndiije ine waawi yahdude no moƴƴi e jaŋde yuumtude karalle e jaŋde ɗemɗe mawɗe.
Unesco e Booñ winndere kala teeŋtinii no feewi, he haala mum en, wonde janngirgol ɗemɗe neeniije ine moƴƴina jaŋde, ine addana almuɓɓe heɓde kattanɗe ceeɓɗe nder fannuuji jaŋde ɗii fof. Naatnugol ɗemɗe ngenndiije nder tippudi nehdi e jaŋde Muritani ine foti wallitde mahondiral renndo, e moƴƴitinde jaŋde sukaaɓe (ko ɗuum humpito men e Duɗal Ɗemɗe Ngenndiije holliti) e udditande moɓe ɓesngu keewɗe fartaŋŋeeji to bannge faggudu.
He joofirde haala kaa
Naatnugol ɗemɗe ngenndiije nder tippudi nehdi e jaŋde Muritani, ko hakke pinal, kono kadi ko huunde jojjunde ngam moƴƴinde jaŋde e nehdi, e moƴƴinde ƴellitaare renndo e faggudu. Aduna oo fof, e humpitooji winndere ndee fof, ine kollita wonde ko ndee yiyannde woni yiyannde moƴƴere, laatotonnde, nafoore. Jaŋde ɗemɗe keewɗe, fuɗɗoriinde ɗemɗe ngenndiije, caggal ɗuum naatniri heen ɗemɗe mawɗe ɗee rogere-rogere, maa rokku sukaaɓe Muritani kattanɗe katojini ngam wellitaade nder oo aduna julyultondirɗo, tawi ɓooraaki neɗɗaagu mum en e pinal mum en.
Ko ɗum ɗoo woni ko ngoongɗin-mi tigi-rigi.
Bookara Aamadu Bah, ñalnde 12/10/2024
