Haralleeɓe cellal ine mbasiyii haɗde sukaaɓe ɓe ndañaani duuɓi 3 huutoraade ƴeewruɗe (erkraaji). Waɗi noon, ko e yonta men haande oo, yimɓe fof ko heen koɗi, jamma e ñalawma, subaka e kikiiɗe, feccere e nguurndam aduna oo ko he telefonaaji e teleeji ekn. Yoga e mawɓe, haa teeŋti e yummiraaɓe, ine koomtira ɗum sukaaɓe, ngam deeƴnude ɗum en, walla deƴƴinde ɗum en, ndaña no kucciri e geɗe goɗɗe.
Ƴeewruɗe ɓurɗe ñiŋeede, ko ƴeewruɗe baaɗe no tele, walla ɓosooje telefoŋ. So tele ine kuɓɓi, jokkondiral ine ustoo no feewi hakkunde sukaaɓe e jiknaaɓe mum en : huunde waawnde telɓinde kattanɗe haala e jotondiral e renndo. Sukaaɓe tokosɓe ɓuri waawde ekkaade ko he gostondiral neɗɗo e neɗɗo, wonaa e ƴeewruga
; ngaandi cukalel ine jogii caɗeele waɗtude nate bertiiɗe ɗe yeeɓata ɗee (2D), nate goonga goonga ɗee, hono nate catiiɗe en ɗee, nate (3D). So ɓe ɓooyii heen (hojomaaji 30 haa 60), ɗuum ine waawi ustude kattanɗe maɓɓe to bannge jaŋde.
Won wiyooɓe “alluuje” ine mbaawi ñiklude ƴoƴre tigguuji, kono ɗuum ko fuunti. Ƴeewde nate ɓole alaa gollal ɗaɓɓirta ƴeewoowo oo ; jidaa e ko neɗɗo weletee ƴeewde walla waɗde koo. E ɗum waawi kadi dottude yiyannde cukalel, sibu ngel woowtat ƴeewde werto faaɗngo (fotngo e ƴeewrugal hee).
To bannge cellal, ƴeewruɗe ine ngoowna ɗaɓɓere mbelemma yitere (ɗum noon hakkille). So ɓooyii ine waawi wonta duudo. Ine jeyaa e baɗte mum bonɗe kadi, ine usta dillugol ɓalndu, mawnina ɗum, saaboyoo ñawbuuli.
Kono ɗii tanaaji fof e heewde, ko jiknaaɓe seeɗa calotoo woownude tigguuji mum en huutoraade ƴeewruɗe ko adii nde ndañata duuɓi 3.
Hol ko ɓuri moƴƴude ?
- . Ardinde pijirlooji goonga e goonga (taro, huutoraade juuɗe mum, yaltude).
- . Hay so ƴeewruɗe ine kuutoree ne, yo a taw ko he dental (tawa kellifaaɗo ine tawaa).
- . Ustude no feewi mudda kuccitgol e ƴeewrugal
Facciro :
2D (2 Dmensions), firti ko Ɓete 2. Ko wertii. Ƴeewrugal ko ko wertii. Ɗerewol kaayit ko ko wertii, jogii tan ko njuuteendi e njaajeendi, woni ɓete ɗiɗi. Njiidaa e ko ɓuri heewde e geɗe taariiɗe en ɗee, jogiiɗe njuuteendi, njaajeendi e tooweeki (walla ɓutteendi), woni Ɓete 3 (3D). Ine hasii ko geɗe tamotooɗe he junngo, memotooɗe.
Bookara Aamadu Bah
