Gila 10 marse 2025 heblooji momtugol humambinaagal puɗɗii e wuro Kayhayɗi. Ko kominaaji tati naftortoo ɗiin heblooji ɗi teemedere e sappo suka debbo. Tammbii ɗiin heblooji ko pelle ɗe ngonaa laamu e gardagol ONG Epaañnaajo, ALIANZA e ballondiral e Save The Children, Amad e Globe e meeriiji kominaaɗi tati ɗiiɗoo : Kayhayɗi, Jowol e Neere Waalo.
Faandaare ɗiin heblooji ko ɗoftude sukaaɓe rewɓe ɓe duuɓi 18 haa 35, ɓe ceerndee e humambinnaagal, ɓe keblee kadi e kattanɗe nguurndam. Caggal ɗuum heblo woɗngo sakkittoongo ngoo, ɓe kebletee ko e keblugol eɓɓooje. Daawal kala heen heblo ko lebbi tati. Daawal gadanal ngal timmii aset ooɗoo 19 – 6 – 2025. Ñalawma oo waɗii e tawtoreede hoohooɓe diiwaan oo, meeri komin Kahayɗi, e ardiiɓe pelle renndo, ummiiɓe e kominaaji tati ɗii.
Udditi ñalawma o ko debbo jooɗaniiɗo fedde Alianza biyeteeɗo Victoriyaa, rewi heen Bah Saydu Usumaan jiiloowo Projet Diango. Caggal ɗuum ko nulaaɗo komin Kayhayɗi Sokna Maadu Jakitee, e denndaangal jooɗaniiɓe pelle limtaaɗe to dow ɗee. Yuɓɓini ñalawma oo ko jooɗaniiɗo Globe. Hooreejo Catal Fedde Ɓamtaare Pulaar to kayhayɗi, hono Usmaan Ñaan tawtoraama ñalawma oo. Sabu ko ngaal Catal joginoo njuɓɓudi jaŋde ndee. Konnguɗi kaalaaɗi ɗii fof, ngarti tan ko e semmbinde jaŋde e golle. Haa teeŋti e jaŋde sukaaɓe rewɓe, semmbinde ɓe no ɓe tammborii nguurndam maɓɓe ko aldaa e yowitaade e sabbaade.
Daawuuda Sammba Ndonngo
