Ñande altine 5 suwee 2006, caggal nde golle ɗe njoofi, Yiilirde Ngenndiire yuɓɓinii jonnde hakkunde mum e nelaaɓe cate ɗee, e sete FƁPS /T.P.Senegaal, e hooreeɓe cate Nuwaasoot, nde teddiniri ɓe hiraande
ñande heen, to galle hooreejo fedde. E nder jonnde nde, haalaama heen ngonka fedde nde, ha teeŋti e caɗeele ɓurɗe hawreede e nder woon e cate fedde nde : ŋakkeende jokkondiral hakkunde cate ɗe e koye mum en, e hakkunde cate ɗe e Y.NG (cate ɗe keewaani jaabaadee binndol maa e telefon, yiilirde ngenndiire ne heɓaani yillaade cate ɗe) ; ko ɓitteende laamu ngu, haa arti e ardiiɓe diiwaanuuji walla perefeeji ɗi, sabu waasde ɗum en hokkude jamirooje yuɓɓinde kewuuji e luɓde woon e nokkuuji walla dingire (Kayhayɗi e daañaa, Nuwaasoot-El Mina e hitaande2003), e leeltinde keɓgol yamiroore laamu wonande ooɗoo kewu (Perefee El Mina, ñande 02/06/06), e yiɗde ɓe uddude duɗe janngooje pulaar (Magaama e Faraa Liitaama / Jinkeere); ŋakkeende jagge ƴellitiiɗe e jaŋde, e humpitiiɓe; ŋakkeende jannginooɓe yarlitiiɓe (ina woodi heblaaɓe heewɓe ɓe ngalaa tawo duɗe, walla saliiɓe jannginde); ŋakkeende ngalu e peeje dañirɗe ngalu; ŋakkeende jeeyngal feewde e leƴƴi koɗdaaɗi, kam e hoohooɓe e alɗuɓe leñol ngol.
Caggal ɗum, sete FƁPS/TPSenegaal hollii njettoor mum feewde e fedde nde, kam e weltaare mum e kewu he. Sete oo teskiima heen : ŋakkeende kumpital, e jeeyngal e njuɓɓudi. Sete oo hollitii tawtoraaɓe ɓe humpito maɓɓe e ko feewti e njilluuji nder leydi maɓɓe, eɗum waawi uutoreede ɗo : ko catal yaltinta fereeji njillu ngu (njoldi e njogitaari terɗe yiilirde yillotooɓe catal ngal) ko adii nde njillu ngu waɗetee ; sete o hollitii kadi humpito maɓɓe e cosgol juɓɓule ngenndiyankooje peewtuɗe e pine leydi maɓɓe. Caggal ɗum sete o wasiyiima yo golle ɗe njahru yeeso, yo ballondiral hakkunde pelle men ɗe jokku no haanirta nii, yo darnde sukaaɓe e rewɓe semmbine e nder golle FƁPM. E nder jonnde nde, Yiilirde Ngenndiire laɓɓitinii cugge e naamne woon e terɗe :Y.NG. hollitii no karte fedde nde njaltirta ( ko e ɗaɓɓaande Catal, caggal nde catal neldi njaru karte terɗe naatɗe, walla kesɗitinɗe naatirɗe mum en), ngonka galle fedde nde (ko feewnetenoo heen fof heblaama e jokkondiral e terɗe laamu, heddii tan ko kaayit oo siifee, fedde nde heɓa galle goɗɗo caggal nde yoɓi jerondiral hakkunde galle gadano o, e galle keso o).
Wasiyaaji
E joofinrde golle, jonnde nde wasiyiima yo FƁPM ummano ɗee golle : ɓeydude jokkondiral mum e laamu ; jokkondirde e Kalifu Geɗe Nderndere mbele ene ñawnda caɗeele kawraaɗe to bannge laamu nguu e to jooɗaniiɓe laamu ngu e nder diiwaanuuji leydi ndi ; jokkondirde e hoohooɓe leñol ngol, e wallondirde e maɓɓe e golle fedde nde ; ummanaade naatnugol jaŋde ɗemɗe ngenndiije ɗe e nder duɗe laamu (e ballondiral e pelle pine, e pelle dawrugol, e leñol ngol) ; daranaade dañde yeewtere to Rajo e to Tele Muritani, e gollondirde e ɓiɓɓe leñol ngol gollotooɓe e ɗiin nokkuuji ; sakkude peeje no fedde nde dañirta Rajo mum ; etaade kala hitaande mawninde jibineede e heɓtineede FƁPM ; ummanaade jonnde mooɓondiral 7 ɓere e waasde yuɓɓinde jonnde diisnondiral e hitaande hikka nde.
Yiilirde Ngenndiire tonngii wasiyaaji ɗi, ma yuurnitoyo ɗi ɗo e yeeso, so Alla jaɓii. Hade Y.NG. wayi nondirde e hoɓɓe mum, nde yettii denndaangal ɗaccuɓe golle mum en, e ɓesnguuji mum en, e nokkuuji mum en, ngari nootitaade e noddaango Y.NG. e tawtoreede Mawningol Hitaande 30 ɓere FƁ.P.M. ñande 3e 4 lewru suwee 2006 to Galle Sukaaɓe Keso to, e to Arafaat : hono Hooreeɓe teddungal FƁPM, sete FƁ/TPS, Fedde Ɓamtaare Ɗemngal Soninke e Muritani, pelle toppitiiɗe pinal e nder Muritani, e naalankooɓe e jabbaaji, e gollooɓe, e fitiramgolleeɓe, e arɓe e inɗe kinɗe leñol ngol, e jiknaaɓe sukaaɓe rewɓe e worɓe tawtoraaɓe seppo ngo, e Cate fedde nde e terɗe mum en, e teelɗuɓe adduɓe ballal mum en e golle ɗe, to Nuwaasoot e to Nuwaadibu.
Aamadu Umar Jah
