Janngooɓe jaaɓi-haaɗtirde, gagga mon jiiɓtaama

Dr Hammadi Faalil Sih, hiisiweejo ŋellitiiɗo, arii ittii teppol sanɗaaji yahruɓe hiisiwal. Ɓaawo deftere makko « Binndanɗe hiisankooje » yaltunde 2016, o rewni heen defetere « Diiñorɗe », hannde njeslaare 13 seeɗto 2022 o yaltinii deftere hesere pul tiitoriinde « Ñoggannde Silo Hiisiwo ». E nder ndee deftere hesere, winndiyanke oo artani en ko e silo hiisiwo toowngo janngeteengo e jaaɓi haaɗtirde. Yahruɓe hiisiwal to duɗe jaaɓi kaaɗtirɗe, ine mbaawi summbude weltaare hankadi, ɓayde kay laawol maɓɓe lohaama, lewaama, ɓuyeere fittaama.

Holi kii dubballeewi ngoɗɗuki, ngubiiki, mbiifniiki to doŋre Orop haa to Ngenndiiji Dentuɗi Amerik, ki cate mum ɓuuɓni nder doŋre Afrik teeŋti e ngenndi makko Muritani. Holi oo ɓiɗɗo paarfaaro leñol, mo Beelinaaɓe jibini kono mo leñol kala hannde renndi ngati leƴƴi kala hannde paamɗi nafooje janngirde ɗemngal neeniwal ine teeɗanoo mo ? Ndii kanngameeri, mbaawnoondi wuurde weltoo to doŋre Orop, kono nde ngalu weeyni juuɗe o rokki ɗum keeci, salii. O laatiima sewnde heelɗunde, wiɗtirde ɗomɗaaɓe ganndal. Kanngameeri keelɗundi, cammitoowo fiɗaaɓe tooke humambinnaagal. Dr Hammadi, wonii ganndo ittuɗo, golle makko e nder hiisiwal, ɓalliwal wontanii en hannde, ñawndorɗe ɗe mbaaw-ɗen dikkoraade yeddooɓe wonde ɗemɗe men ko baawɗe tammbaade gannde maa añɓe ɗemɗe men, ɓe ɗemɗe mumen laatii njartudi puŋŋiniiɗe e dow ciibe ine njartoo ɗemɗe men.

Dr Muhammadu Faalil Sih ko hiisiweejo, biɗtoowo e Hiisiwal, o jannginii to University of Virginia (USA). O jibinaa ko 23 Siilo 1990 to Beelinaaɓe (Muritani) O waɗi jaŋde lesre e ngoon wuro O waɗi jaŋde hakkundeere ko Lycée Kayhayɗi O heɓi ko bak C hitaande 2009 O fayi leydi France ngam jokkoyde toon jaŋde makko toownde e fannu hiisiwal. O heɓi toon doktoraa 2017. O naati University of Virginia 2018 ngam ɗowde wiɗtooji makko hiisiwi, omo janngina e ngaal duɗal kadi hiisiwal. O wiɗtata oo sahaa ko to duɗal biyateengal Imperial college London ; omo gollodoo toon e Martin Hairer keɓɗo galaŋ Fields e hitaande 2014 (njeenaari ɓurndi toowde nder hiisiwal.

To baɗte njeenaaje e cuɓtaaje: 

E hitaande 2013, o heɓii Bourse d’excellence mo Université Cergy-Pontoise (France) E hitaande 2014, o heɓii Prix au mérite mo académie de Paris E hitaande 2014, o suɓtaa e 11 nder 800 ngam heɓde Bourse ganndaaɗo biyateeɗo DIM (Domaine d’Interêt Majeur) ɗowirɗo golle doktoraa makko. E hitaande 2015, o heɓii njeenaari FSMP (Fondation Sciences mathématique de Paris) wondude e Banque CASDEN E hitaande 2016, o jaɓɓaama to Orlando (USA) ngam yeewtude to pottital hakkunde-leyɗewal paatungal e Hiisiwal E hitaande 2017, o jaɓɓaama to Bratislava (Slovaquie) ngam yeewtude to pottital hakkunde-leyɗewal paatungal e Hiisiwal E hitaande 2019, o jaɓɓaama to MIT (Massachusetts Institute of Technologie) ngam yuɓɓinde yeewtere faatunde e peeje kese ɗe o naattini ngam jiiɓtude huunde e gaggaaji gudditinooɗi O heɓii yeewtude e nokkuuji goɗɗi nder Amerik e Orop ko faati e wiɗtooji makko hiisiwi. Ko faati e ɗemngal, e 2014 o yaltinii « Binndanɗe hiisankooje ». E 2019, o yaltinii « Gannde hiisiwe ». O heɓii tawtoreede jeewte hakkunde-leyɗewe ko faati e ɗemɗe Afrik (Dakar – Bamaka – Liege).

JAAYRE PINAL-JP
Jaayndiyanke GOLAL MEDIA