Rawaandu ine jeyaa e kullon ndewnaari ɓurkon hoontude he neɗɗo. Jooni kadi rawaandu ine tuumee mooftude coktirgal safaara nguɗu (kaaseer). Kippu gooto wiɗtooɓe to duɗal jaaɓi-haaɗtirde Tours (Farayse) ine yiyti yowiti gooto nder rawaandu jaakoraaɗo wayloyde safaara nguɗu. Ko ɓe puɗɗii hoolkisaade koo ine weltini no feewi, haa teeŋti noon wonande nguɗu hoore e nguɗu baggol, e wiyde wiɗtooɓe ɓee. E wiyde maɓɓe, ɓe ngoni ko he fuɗɗoode jarribo kono ko fuɗɗii feeñde heen koo, ine softini no feewi.
Ɓe mbiyi « ndeen min ndokkii doombi yowiti oo, he nder jonte seeɗa min teskiima ñawu nguu dartiima tem. Ɗumɗoon noon ko huunde softinoore ». Ɓe ɓeydi heen « amin ɗaminii waawde safrirde dafaaɗo amen gadano ndeeɗoo feere ». Miijo maɓɓe ko naatnude yowiti oo he neɗɗo (sibu alaa ko o waɗata aadee), nder ñawannde nguɗu ndee e hoore mum : « ɗuum maa bonnu celule ñawɗe ɗee, kadi findina paddorɗe neɗɗo ñawɗo oo, sibu ñawu nguu heewi idoraade ko ɗanninde paddorɗe joomum ». Tee safaara oo jogotaako hay batte goote e cafrotooɗo oo.
