Talaata 11 abril wonnoo Ñalngu winndereewu Ñawu Parkinson. Ñawu Parkinson ko ñawu mbaroowu ɗaɗi ngaanndi. Ine jeyaa e maale maggu : siññere ɓalndu, jaɗɗugol terɗe, caɗeele dillugol. Ɗee maale ine ngonda kadi e doŋkal ɗoyngol, caɗeele tino, muuseeki mbaawki yuumtude e kaaɗi.
Ñawu nguu alanaaka safaara, kono leɗɗe ustooje baɗte maggu ine ngoodi. Ko e hitaande 1817 Sir James Parkinson, cafroowo biritaannaajo idii teskaade baɗte maggu, kono ko e hitaande 1872 ngu inniraa mo, caggal nde ɗaɗiyanke faraysenaajo lolluɗo biyeteeɗo Jean-Martin Charco wiɗti ñawu nguu no feewi, waggini yo Parkinson teddinire innireede ngu.
Yeru, to Farayse, 270 000 neɗɗo ine ngondi e ñawu nguu, tawi ko ɓuri heewde heen ko worɓe. Kono wonaa nayeeɓe tan ngondi heen, sibu engu yana hay e sagataaɓe ɓe ndañaani duuɓi 50. Ko goonga noon anndaaka no feewi ko addata ngu, kono tan yimɓe ine kawri wonde geɗe taariindi ine njeyaa e ko wallitta ñawu nguu, ko wayi no kuutoragol puudareeje ndema. Gila 2012 ñawu Parkinson jaggiraa no « ñawu remooɓe ».
Bookara Aamadu Bah
A jaaraama ceerno A weltaama sanne