Fedde aduna toppitiinde ngonka weeyo (Organisation météorologique mondiale (OMM)), he nder ciimtol mum kesol ko ɓooyaani, woytiima ɓeydagol tolno gaasuuji ɓeydooji nguleeki, ɓeydagol nguleeki dow leydi, e dijjiɗgol maaje, ƴerngo maaje e caaygol penndiiɗe.
Hannde, ñalnde kala, yimɓe ine njiyra gite mum maale baylagol ngonka weeyo, haa teeŋti noon e ɓeydagol nguleeki : toɓooli ɗufaan, ile mawɗe, yoorooji, cumuuli ladde mbeñcitɗi nguurndam ngaadoraaɗam ujune-ujune yimɓe, mbonni dañe ko ine tolnoo e miliyaaruuji keewɗi dolaar.
Ciimtol ngol hollitii wonde, hono hitaande 2023 maaynde ndee e wulde, meeɗaa waɗde. Hono duɓɓi sappo ɓennuɗi ɗii e wulde meeɗaa waɗde. Ciimtol ngol hollii kadi wonde « baylagol ngonka weeyo haaɗaani tan e ɓeydagol nguleeki. Kono engol teskii ɓeydagol nguleeki maaje, e caaygol penndiiɗe to gulli Leydi, ine hulɓinii no feewi ». Aduna oo fof ine hawri wonde sabaabu gadano nguu mbayliigu ko aadee e hoore mum :
Golle aadee baaɗe no kuutoragol yakawere ɓarakke (geɗe ƴulɓe, petroŋ, gaas), lewgol dunli e ndema uddiika, ko geɗe jaltinooje no feewi gaasuuji ɓeydooji nguli.
Lewgol dunli : lewgol dunli ine usta kattanɗe Leydi moɗde gaas ƴulɓo.
Kuutoragol geɗe wayliwal ko wayi no gaas filsideer (CFCs) e kilim moƴƴaani e laral oson, ndeke ine ɓeyda nguleeki weeyo.
E tonngol, ɓuri saabaade ɓeydagol nguli weeyo ko golle aadee (yimɓe) jaltinooje gaasuuji ɓeydooji nguli weeyo, tee jogiiɗe baɗte memotooɗe he ɗaŋre men (Leydi), ko wayi no ɓeydagol nguli, caaygol penndam, kam e kewuuji ceɓɓitti. Ko yiyetee jooni koo ine seedtoo ɗuum.
Mbiimtam ndiyam (so a fasnii ndiyam, aɗa yiya ko wayi no cuurki nii ina wiimtoo, ko ndiyam wonti ɗoon cuurki). Gaasuuji gaddoojii seer ɗii kala so ndenndinaama, mbiitam ndiyam wonata heen ko 70%. Kono, nde tawnoo ɗam ɓooyataa e weeyo (balɗe 10 so heewii), batte majjam e ɓeydagol nguleeki ina pamɗi (ɗam wontata ko duule walla lay). Yanti heen, wonaa golle aadee ngaddata ɗum, sibu ɗum jeyaa ko e baylagol diƴƴe gaadorangol.
lGaas ƴulɓo (CO2) e gaas biyeteeɗo metaan walla won ɗiin gasuuji ummotooɗi e « filtoks », walla ɓuuɓnooji (gaasuuji filsideer ekn ) walla kadi ko wiyetee Oson koo, ko gaasuuji gaddooji « seer » ɓooyooji no feewi e nder weeyo (hakkunde duuɓi 20 e duuɓi 50 000), tawi yoga heen ko aadee saabii ɗum en. Gaas karbonik ina waawi wonnde 100 hitaande e nder weeyo. Omo jogii iwdiiji ɗiɗi : kuɓɓugol geɗe ummiiɗe e ɓarakke nguurndam (petroŋ, ƴulɓe, cuurki laaɗe ekn) walla ustagol leɗɗe (maaygol dunli, walla cumu ladde ekn). Ko neɗɗo woni sabaabu ko ɓuri heewde e makko. l l Gaas biyeteeɗo metaan oo ne ina waawi wonde e weeyo fotde duuɓi 14. Omo waawi ummoraade e sato (alaa ko neɗɗo woni heen) e nokkuuji leppuɗi e ñolgol puɗi … walla o ummoroo e ndema (gese ilneteeɗe) ekn
l Gaas biyeteeɗo protoksid asot (N2O) heewi ummoraade ko e ndema (engere) walla kuɓɓugol batte nguurndam, walla e golle mbaylaandi (isinaaji). l Gaasuuji kuutorteeɗi e « filitoks » walla e « filsideeruuji » maa kilimatiseeruuji ekn … ko neɗɗo woni sabaabu mum en. Eɗi mboni e weeyo no feewi. l Gaas biyeteeɗo Oson oo, maa rennda e on ɗiin gaasuuji goɗɗi nde jogoo batte ɗe moƴƴaani e weeyo. Bonannde makko kadi fawii ko e nokku ɗo o tawetee : won e nokkuuji (tooweeki hakkunde 12 e 50 kiloomeeteer) o ɓuuɓtintu weeyo (ɗo omo moƴƴi e men).
KO FIRTI « SEER »
Ko ɓuri heewde e cereeli naange taccat weeyo, njana e leydi, ngulna ɗum. Leydi ne, wukkita huunde e kiin nguleeki feewde e weeyo. Mbiimtam ndiyam e gaas ƴulɓo (karbonik) e gaasuuji goɗɗi (woni gaasuuji gaddooji seer) moɗa kiin nguleeki, kaɗa ɗum ŋabbude, nii woni ɓeyda nguleeki weeyo. Ko ɗum woni ko wiyetee « seer ».
Bookara Aamadu Bah
