Hakkunde Google e ɗemɗe

Google ɓooyii daranaade ɗemɗe, e rokkude ɗum en fartaŋŋe waawde huutoreede. Ɗum noon eɗen poti yettude ɗum sabu darnde mum ngam liɓde heɗɗooji gonɗi hakkunde ɗemɗe e newnude jokkondiral hakkunde yimɓe.

Ciftinen tan :

Google in Your Language (GIYL) (Google he ɗemngal maa)

E hitaande 2001 Google lelniino tuugnorgal biyeteengal « Google in Your Language » (Google he Ɗemngal maa), ngam naatnude 40 ɗemngal nder sarwisaaji mum, e rokkude neɗɗo kala kuutorɗe ngam firde sarwisaaji Google he ɗemngal mum. E hitaande 2010, nde Google woppata ndeen eɓɓaande, tawi firo he Pulaar ngoo ine yahra e 2 753 konngol pirangol nder 8 045 konngol, potnooɗi fireede ɗii (woni 34%). Kono nde yahnoo haa ɓooyi, Google dartini ndeen eɓɓaande.
Yah ɗoo ngam ɓeydaade ƴellitaade heen. https://pulaar.org/2009/11/02/google-e-%c9%97emngal-ma/

«Google e ɗemngal ma»

Ɗemɗe paayaaɗe

Ñalnde 20 juin 2012 Google lelnii eɓɓaande woɗnde inniraande « Endangered Languages » (ɗemɗe paayaaɗe) ngam wallitde haalooɓe ɗum en reende ɗeen ɗemɗe e hisnude ɗum en. Aɓe mbaawi kadi waɗde golle tiiɗɗe, ɓe naatna ɗemɗe maɓɓe he internet.

Google Translate (Firirde Google)

Ñalnde 26 février 2020 Firirde Google (Google Translate) naatnii ɗemɗe joy (5) kese. Oon sahaa ɓe teeŋtinii Google janngata ko he firooji gonɗi nder Internet. Ɗemɗe ɗe caraaki no feewi he internet ine metti firde, kono Alla e jaŋde masiŋaaji kam e coftal renndo Google Translate, ɓe mbaawii ɓeydude heen ɗemɗe joy kese hono ; kinyarwandiire, odia (Oriyiire), tatariire, Turkmeeniire et Uyguuriire. ɗemɗe 5 gadane ɗe ɓe naatni e nder duuɓi nay. Nii woni ɗemɗe Google Translate njettii 108.

Ñalnde 11/5/22 ɗemɗe 22 goɗɗe ɓeydaa, ine heen ɗemɗe afrikeeje ɗeeɗoo : Bammbara e Lingala, e Uwi, Krio, Luganda, Oromo, Sepedi, Tigrinya, Tsonga, eau. Faandaare Google wonnoo ko « rokkude mo woni kala mbaawka, ɗo waawi wonde fof, faamde aduna oo e waawde haalde ɗemɗe keewɗe ».

Kadi, e wiyde Google, to bannge karallaagal, « daawal waɗaama he ndee ɗoo rogere. Ngol woni gadanol ko masiŋaaji ɗii ekkiniraa ɗemɗe ɓeydaaɗe ɗee, binndanɗe he ɗemngal gootal, woni ɗo tuugnaaka e yeruuji ɗo ɗe piraa e ɗemngal goɗngal ».

Ko tuggi ɗoo Google rokki yiɗɓe yo ɗemɗe mum en naat he Firirde mum he rogere faande, fartaŋŋe wallitde ɓeto firooji walla wallitde firo konngi nder Translate Contribute (ballital firo).

Ñalnde 31 mars 2024 Google hurmini hattannde « Wallitde » (rokki yimɓe hattan wallitde), joom en ɗemɗe heewɓe mbaawii sakkitde firooji celluɗi kala nde Firirde ndee yaltini firo ngo moƴƴaani. Kono tan, caggal nde tippudi ndii yahri yeeso, ndi ɓeydii humpitaade, Firirde ndee ɓeydii moƴƴude no feewi. Ko ɗuum addani Google daaƴde (momtude) hattannde « Wallitde » (itti ballitgol ngol). Kono huutortooɓe Firirde ndee ine mbaawi haa hannde neldude cakkitde mum en rewrude e jaaɓnirɗe mum en Android e iOS e Ordinateer so tawii ɓe miijiima firo ngoo ine waawi ɓeydeede moƴƴineede.

Wasiyaaji

Wasiya men gadano mo  kuccinten he fulɓe ko yo ɓe njokku darnde mbele firirde Pulaar to Google Translate ine ɓeydoo alɗude sibu firirde ndee ine heddoraa to bannge kelmeendi e jokkude janngude ñeeñal ɗemngal ngal. Ɗum ɗoon ko maa enen e koye men teddinen huutoraade Google Translate e sakkitde firooji ɓurɗi sellude…

Wasiya ɗimmo oo ko teddinde waɗde binndanɗe nder internet gila e  wuurnude lowe pulaar he nder internet, gila e lowe keeriiɗe (yeru pulaar.org) haa e Wikipedia. Ine moƴƴi noon kala ko ine waɗee heen, eto-ɗen sellinde binndol ngol. 

Wasiya tataɓo oo ko teddinde huutoraade ɗemngal ngal he nder laylayti renndo  (Facebook, WhatsApp ekn.) gila to binndol haa e haala (hito).

Waɗi en waɗde ɗii wasiyaaji ko sabu anndude masiŋaaji ƴoƴɗi ɗii njanngata ɗemɗe ɗee tawo ko  he loowdi taweteendi nder internet, e tuugnaade e ko Google e hoore mum haali e ƴoƴre tafaande huutortoo ndee (PaLM 2) he nder Google Translate : “PaLM 2 ekkiniraa (jannginiraa) ko kelle geese (pages web) ciggaaɗe, defte, jimɗi, cifti,  binndanɗe Wikipedia, lowe internet, konngi, tinndi he keɓe binndaaɗe nder ko ine ɓura 100 ɗemngal.”

Kadi maa ɗum wallit pirirɗe goɗɗe walla juɓɓule goɗɗe kadi janngude ɗemngal ngal, nde tawnoo ngon-ɗen ko he yonta ƴoƴre tafaande. Ɗemngal ɓurngal mawnude Gerngal keɓe fof ɓurata newaade jannginde e naatnude nder juɓɓude kaɓirɗe kese ɗee.

Njettoraaji

So ɗum yawtii njettoraaji men teeŋtuɗi faade e denndaangal wallitɓe haa Pulaar naati he Firirde Google : gila e goomuuji cosraaɗi ɗuum (yeru Google Fulfulde Translate), haa e teelɗuɓe jolatnooɓe he lowre hee ine pira, ine cellina, haa e loowooɓe binndanɗe Pulaar nder internet (gila e lowe haa e sifaa keeriiɗo), yeewtirooɓe ɗemngal ngal nder laylayti renndo, loowooɓe binndanɗe to Wikipédia ekn. Kamɓe fof kadi ɓe cemmbinaama jokkude golle, mbele firooji ine ɓeydoo kadi moƴƴude, haa pulaar naata pirirɗe goɗɗe, yeru ko wayi no Microsoft Translator, DeepL ekn.

Bookara Aamadu Bah