Fooyre Ɓamtaare ine yetta Faatimata Umar Kelli sabu keɓgol mum, ñalnde alkamiisa 18 sulyee (morso) 2024, seedantaagal doktoraagal toowngal paatungal e seeko ɓerɗe e ɗaɗi (genndule) ƴiiƴam. He nder leydi ndii, ko ɓe rewɓe ɗiɗo heɓde ngal ɗoo seedantaagal. Nde o ummanii heblude ngal ndee, heewɓe mbiyi mo « ɗum wonaa ko rewɓe » sibu ine saɗi, ine muusi. Kono ɗuum ɓeydi ko pellital makko jokkude ndeen jangde e liɓde palal kaɗooje ɗe renndo yiɗi haa jooni, lesɗinirde rewɓe. O yettaama kadi he ndee tiiɗnaare, e ngal pellital, sibu, so goonga, ko huunde saɗnde wonnoo : nawdude jaŋde e golle nder galle e toppitagol sukaaɓe weeɓaano.
O jeyaama e yimɓe renndo teeɗantooɓe ko toowi, he nafoore yimɓe fof. Faatimata Umar Kelli janngi doktoraagal kuɓtodinngal ko Duɗal jaaɓi haaɗtirde Ndakaaru. Caggal ɗuum o golliima duuɓi ɗiɗi hade makko naatde heblo luggiɗinagol he fannu seeko ɓerɗe e ɗaɗi ƴiiƴam. Iwdi makko ko Sahre Ndoogu. Omo yahra hikka e duuɓi 33. En mbiyii yo o jogoro jam, jinnaaɓe makko e ɓesngu Muritani no ndiidorinoo naftoroo ganndal makko. Aamiin Fooyre Ɓamtaare
