Oo beetawe 7 Silto, Dental Jiingenaaɓe gollotooɓe he Laamu (L’Amicale des fonctionnaires de Gjingué) yuɓɓini ñalngu ngam teddinde Aamadu Buuɗi Soh. oo gorko coftuɗo, jarlitiiɗo mo yimɓe fof ceedii darnde mum he duɗal Jiinge gila sosaa haa e ooɗo ñalawma. Aamadu Buuɗi Soh jibinaa ko e hitaande 1935 he nder Jiinge, baaba makko wiyetee ko Buuɗi Abdul Fili, yumma makko wiyetee ko Takko Aamadu Kummba Fili. O jibinaa ko e nder galle ndema e ngaynaaka, o ɓuri teskoreede ko he ngaynaaka, sibu ko gaynaako mawɗo o wonnoo, ko kanko idii ƴaraade nayi e nder Jiinge ɗo ƴaro baali tan andanoo.
Denndaangal jannginooɓe walla meeɗnooɓe wonde he duɗal ngal, mbismaama, njaaraama heen, heewɓe kadi teddiniraama nguu ɗoo ñalngu pattamlamu, ko wayi no ɓesngu Falaah, Cukko hooreejo Fedde Falaah, Hooreejo Diiso Njuɓɓudi Duɗal ɗemɗe Ngenndiije (IPELAN), hono Abuu Alhajji Maamuudu Bah e miñum Ibraahiima Alhajji Maamuudu Bah, e wonndude e Kadiija Mammadu Duwaa Jallo mo jinnaaɗo mum wonnoo gooto e calɗi Fedde Falaah. Ɓesnguuji meeɗnooɓe jannginde he duɗal hee gila e fuɗɗoode (duɗal ngal fuɗɗorii ko FALAAH mo Ceerno Alhajji Maamuudu Bah), haa meeɗnooɓe ardaade ngal kam e hoohooɓe laamu (Waalii Gorgol, Haakem e DREN, meer kommiin oo).
Ɗowi ñalngu ngu njuɓɓini geɗe ɗee haa feewi, he daande mum he Pulaar ko Ibaa Bilaali Sal, he Arab ko Aali Abuu Bah.
Ñalngu ngu udditira ko konngol Ɓuraana e daande Ceerno Muhammadu Mansuur Wan to Jowol. Sukaaɓe rewɓe njimii Jimol leydi Muritani e cuutgol Araaraay mum. Caggal ɗuum ko meer Kommin Ɗalahaya ƴetti konngol, salmini, holli weltaare mum taweede oo beetawe e innde komiin oo. O yetti sukaaɓe Jiinge he ngoo miijo moƴƴo. O seedtii wonde Aamadu Buuɗi Soh ina yiyee e batuuji jokkere enɗam e ƴellitaare kala. O yetti jiingenaaɓe sabu darnde mum en, yeru ƴeftugol jannginnooɓe, ine njoɓa ɗum en, sabu kadi darnde mum he ɗemɗe ngenndiije. O yetti laamu ngu e gardagol mawɗo leydi ndii.
Goomu pinal Jiinge Jeeri e diɗɗal jiinge e ballondiral Muusaa Saar naalaŋke mawɗo, njirwinii beetawe oo. Sukaaɓe rewɓe sinkiiɓe, suɗiiɓe, ɓoorniiɓe wutteeji gaaɓɗi, ina njogii kore e leppi gude cañaaɗe, tenngaaɗe, cakkaaji jarnaaɗi,moorii haa njooɗi, mbaɗi gorol, taarii dinngiral ngal, cinkii ñalawma oo. Jimɗi Baaba Maal, gila e Wanngo, Sakkam Bewɗo, ina duusi ɓe. Ko jiidaa e jimol jaaroore Aamadu Buuɗi Soh.
Ibaa Bilali Sal rewni heen yimre heeriinde feewde oo gorko dariiɗo.
Caggal ɗuum mawɗo Aamadu Buuɗi Soh fiilaa Lefol Yarlitaare e Katantaagal, wondude e wutte e paɗe, tenngaade, e seedantaagal. Ko almuɓɓe duɗal ngal (Aysata Umaar Bookum, Jah Abdarahmaani Sammba, Abdullaay yero Soh), ñaanti mo.
Sal Maamuudu Jaalaw (1982) jeyaaɗo to Wuro Jaalaw, ƴettii konngol, e innde hooreeɓe duɗal ngal, holli weltaare mum e sahaa nde o ari Jiinge, o wiyi mawɗo Aamadu Buuɗi Soh ko gorko moƴƴo, o jaari jiingenaaɓe.
Kadiija Mammadu Duwaa Jallo (Baaba makko idii jannginde duɗal Jiinge he 1955), kam ne hollitii ñalawma oo ko ñalawma weltaare. O wiyi aɓe njogii dadiiɓe, yarlitaniiɓe Alhajji Maamuudu Bah, ko wayi no Aamadu Buuɗi Soh, jannginɗo yimɓe heewɓe, felli jihaadi. O jaari ɓesngu Jiinge ngu golle mum poti ñemmbeede.
Abuu Alhajji Mahmuudu Bah kam ne wiyi “hannde ko ñalawma mawɗo, Aamadu Buuɗi Soh winndii deftere”. O wiyi Duɗal Jiinge dariima heddii ko dañde kolees haa ko ɓuri ɗoo. O duwanii Aamadu Buuɗi Soh, o jaari jiingenaaɓe.
Njaay Saydu Aamadu jaari arɓe ɓee fof, o holliti wonde ñalawma oo ina heewi ɓure, Aamadu Buuɗi Soh duusii, ɗoftii, nehii, o jippinii. O refti he konngol Murtuɗo ɗo wiyi “leñol wonataa haaside, wuro wonataa haaside”. Aamadu Buuɗi jeyaa ko e dariiɓe, o jeyaa ko e yarlitiiɓe. O yetti adduɓe miijo ngoo e jaɓɓe miijo ngoo. O seedii hono ngalɗoo teddungal meeɗaa yiyeede, ko leeli, ɓuri ko jibinaaka, ɓamtagol wuro maa waɗa dadiiɓe. Aadee ko gollal mum yettata ɗum, ngalɗoo gollal maa ɓooy haalteede.
Kalfinaaɗo konngol Ɓesngu Aamadu Buuɗi Soh hollitii weltaare mawnde, wonde “ko dilli fof, hol ko dillini ɗum”. Heewɓe nootoriima banngeeji fof, jaranii ɗum en tawtoreede ñalawma oo. “Heewii golliiɓe tinaaka, ko onon teddi”. O wiyi ɓesngu Aamadu ina wiya on bismalla mon he Jiinge. O jaarii jowolnaaɓe sibu ko Jowol woni Jiinge.
Ibraahiima Buubakaar, gooto e idiiɓe janngude e duɗal Jiinge, Usmaan Aamadu Njaay, jannginoowo e duɗal Jiinge ceedtiima ko moƴƴi he Aamadu.
Fedde Piindi pinal Jowol addii kam neballal kaɓirɗe jaŋde.
Naalaŋke Muusaa Saar uddi ñalawma oo waktu 13 ina fawi hojomaaji 20.
Nguuɗo ñalngu jiinge waɗii ngartam no feewi. Mawɗo Aamadu Buuɗi Soh wonii yeru potɗo ñemmbeede. Ɗum noddi ko faayiida gonɗo e darnde jinnaaɓe sukaaɓe e duɗal wuro, ko darnde himmunde, wallitoore ƴellitaare jaŋde. Pulaar wiyi neɗɗo ko golle e balle, so tawii o nattii ko golle makko keddotoo, golle ngidoo haala wattindoo, Aamadu Buuɗi Soh golliima, kala janginnooɓe e duɗal Jiinge darnde mumen yiyaama, jagge keewɗe njaltii e duɗal Jiinge, yo Alla ɓeydu barke.
Usmaan Ñaan̵ Kayhayɗi
