Ko ñalnde 5 korse laana maɓɓe (Starliner Boeing) diwnoo faade jipporde weeyo hakkunde leyɗe (Station spatiale internationale anndiraande ISS). Ɓe potnoo waɗde toon ko balɗe jeetati, kono caɗeele karallaagal keɓtii laana kaa, alaa fof no ɓe mbaɗaani. Kono Nasa habrii, ñalnde 7 juko (ut) ndee, wonde ine anniyii neldude laanel SpaceX ngam artirde “yooliiɓe” weeyo ɓee. Kono maa ɓe pada haa colte (feebariyee) 2025 nde ɓe mbaawa artude he leydi.
Ɗum ɗoo noon ko gacce mawɗe (goɗɗe) wonande Boeing, hono fedde maamaare tafoore diwooje, nde Nasa halfinnoo, kañum e SpaceX (fedde Elon Musk), tafde gooto fof laaɗe ɗannorɗe weeyo. SpaceX kañum fuɗɗiima diwnude laaɗe mum faade jipporde weeyo too, duuɓi nay (4) jooni, Starliner noon fuɗɗii tan ko he lewru korse ɓennundu ɗoo nduu, hay ɗum ne ko ngam ƴeewndaade. Kono, gaa gaa tardude duuɓi nay, hay ƴeewndo ngoo ko caɗeele.
He laawol hee, Starliner hawrii e caɗeele dampugol e ciyam gaas heliyom, kono waɗdii heen kam haa yettii ISS, ɗo ka fotnoo seŋaade balɗe jeetati, ka artira ɓe ka jolnunoo ɓee, hono Butch Wilmore, duuɓi 61, e Suni Williams, duuɓi 58. Ngam kisal maɓɓe, Nasa suɓii waɗde ƴeendooji keewɗi ngam faamde ko heɓtii laanel ngel koo, haa yenanee angel waawi artirde ɓe he kisal, kono ronki hoolaade. Nii woni Starliner arti ñalnde 7 silto (settaamburu) ɓennuɗo oo meha, weeyooɓe Nasa ɗiɗo ɓee keddii toon nder ISS, haa ɗanngal SpaceX paangal he lewru colte 2025.
Bookara Aaamdu Bah
