Ñalnde 31 kawle (oktoobar) 2024, fedde nde wonaa laamuyankoore daraniinde wallude Golle Ƴellitaare Faggudu e Renndo (ONG Appui aux Initiatives de Développement Economique et Social) (AIDES)) yuɓɓinii gollordu ngam hirjinde jaaynooɓe ko faati e sariya Teddungal (sariya Karaama), sariya kaɓotooɗo kuutoragol ndoolndoolaagu dow rewɓe e sukaaɓe rewɓe.
E nder ɗuum, ko ine abboo e jaaynooɓe noogaas, gollooɓe he jaayɗe laamu (rajo e tele) haa e jaayɗe binndol keeriiɗe (ine jeyaa heen Fooyre Ɓamtaare), tawaama gollordu nduu, e dow ballal Booñ Kanada Golle Nokku (Fonds Canadien d’Initiatives Locales (FCIL)) he nder Muritani.
Malal Sammba Gise, hooreejo AIDES, hollitii wonde « gollordu nduu waɗanaa ko jaaynooɓe sibu maɓɓe huɓindaande karallaagal golle caaktugol, mbele aɓe mballita caaktugol sariya Karama kaa he nder jeewte ɓe njuɓɓinta, e ciimti ɓe mbaɗata e naamne ɓe kuccinta e hoohooɓe renndo ».
Ibraa Geelel Saawo Jokkorgal FCIL he Muritani hollitii wonde faandaare ndee ko mbele « rewrude he ndee eɓɓaande, jaayɗe gaadoraaɗe ɗee, e laylayti renndo ɗii e hoohooɓe diine ine ndaroo darnde tiiɗnde ngam yaajnude miijooji moƴƴi paatuɗi e kormagol rewɓe ».
Ciftinen tan eɓɓaande sariya Karama ndee waɗiraa ko kaɓde e ndoolndoolaagu paweteengu dow rewɓe e sukaaɓe rewɓe. Duuɓi nay jooni, ronkaama yo laamu huccan ɓenninde sariya kaa. Sarɗirdu ngenndi riiwtii nde e cili ɗiɗi jooni. Kono daraniiɓe eɓɓaande ndee ɗamtindaaki maa sarɗirdu ngenndi nduu jaɓoy nde. Haa teeŋti noon, e balɗe cakkitiiɗe ɗee, sukaaɓe worɓe tato njanii he suka debbo sanɗa janngoowo to duɗal jaaɓi-haaɗtirde Nuwaasoot, njangu kulɓiniingu, yeeso jinnaaɗo mum gorko dafaaɗo, ngu yimɓe fof cunii he mum.
Fooyre Ɓamtaare saakttino eɓɓaande sariya teddungal ndee he tonngooɗe mum ɓennuɗe ɗee.
Bookara Aamadu Bah
