Lappol jokkorde pelle pinal jooɗodiima e Muusaa Faal kalfinaaɗo heblo Kaaldigal ngenndi ngal laamu yiɗi yuɓɓinde ngal, ñalnde aljumaa 30 mee 2025. He ndeen joɗnde kanko kalfinaaɗo oo, o semmbinii jokkondiral ngal, o holliti kaaldigal ngal ine udditanaa pelle baaɗo no pelle men ɗee nii, gooto fof yo ar dallina heen ko yiɗi koo, dallinira ɗum miijooji ɓeydooji, haa ɗo yimɓe nanondiri fof.
Lappol ngol waɗanii mo daartol pelle ɗee kam e darnde mum en ngam haɓde e humambinnaagal e ɓamtude ɗemɗe ngenndiije, haa arti noon ballal majje e ƴettugol pellital naatnude ɗe nder jaŋde leydi ndii e hitaande 1979, e ko sakkitii koo e hitaande 2022, e cosgol Duɗal Ɓamtaare e Jaŋde Ɗemɗe ngenndiije (IPELAN). Lappol ngol tottii mo ɗee binndanɗe :
- Dallinannde laawɗingol ɗemɗe ngenndiije e naattingol mum en nder jaŋde leydi ndii ;
- Humpito jaŋde ɗemɗe ngenndiije nder Muritani ;
- Bayyinaango sakkitiingo pelle ɗee (20/05/2025) ;
- Ɓataake keeriiɗo faade e Kalfinaaɗo heblo kaaldingal.
Lappol ngol teeŋtinanii mo caɗeele mawɗe ɗemɗe ngondi hannde ɗee : waasde laawɗineede, famɗude ko teskaa nder jaŋde e nder jaaynirɗe leydi ndii, famɗude ko heɓi ballal laamu, e ɗaweede he juɓɓule pewjooje.
Pelle ɗee cakkitii miijooji baawɗi moƴƴinde kaaldigal jiɗngal yuɓɓineede ngal, ɗe nduwii nde laawɗingol ɗemɗe ngenndiije keddiiɗe ɗee (sara arab) e kuuɓtodingol jaŋde majje nder duɗe laamu (duɗe gaggaaji e jaŋde lesre) jeyoytee e pellitte kaaldigal ngal, sibu, wonande pelle ɗee, keewal ɗemɗe ko salndu teeŋtundu ngam mahde renndo nuunɗungo, deeƴngo.
Nuwaasoot ñalnde 30 mee 2025
Jokkorde
