Bisimilla ena faya, ena fooƴa hono no Saydu Mbac mo Hoore Foonde heewnoo wiyrude nii. Yo Geno ɓuuɓan mo, kaŋko e denndaangal maayɓe juulɓe ngenndiyaŋkooɓe. So bisimilla fayii wonaa duuso fooƴnata ɗum. So bisimilla kadi fooƴii, wonaa duuso, haa hannde, faytinta ɗum.
Ƴella bismiima Enɗam Maam Wad bisimilla payɗo saɗne. Ñalɗi 17, 18 e 19 lewru duujal 2025, Ƴella Palel Daande Maayo jaɓɓiima batu ngaadoraangu Enɗam Maam Wad. Faandaare ndee ko yiytondirde e jokkondirde enɗam e wuurtinde finaa-tawaa subalɓe ngam rontinde mo yontaaji garaooji sabu teskaade ko heewi woni ko e ɓoccitaade fuutaŋkooɓe. To bannge tuugnorgal golle Enɗam Maam Wad ko nii lelorii :
-Ñalnde 17, subaka oo ko jaɓɓagol, jippingol e bismagol hoɗɓe. Kikiiɗe ko daay-daayre, jamma oo ko batu yiilirde Enɗam Maam Wad e gardagol hooreejo njuɓɓudi ndii hono Mammadu Abdullaay Wad, gorko Joomanndu, jooɗiiɗo to Mbuur Daangel Maayo.
– Ñalnde 18 ndee, subaka oo ko silki Quraana e konngi bismaango Joom-wuro e almaami jamaa feewde e hoɗɓe arɓe ɓee. Kikiiɗe ko batu kuuɓtidinngu Enɗam Maam Wad. Jamma oo resanaa ko hiirde pekaan.
– Ñalnde 19 ndee ko mbayniigu e duuso hoɗɓe arnooɓe
E yettere Geno, geɗe ɗee fof ndewii laawol kadi ndañii siyneede haa heddii daay-daayre fotnoonde waɗeede ñalnde 17 ndee. To bannge gure Enɗam Maam Wad, kannje fof ɗe nootodiima. Tuggude e Ŋawle, Daabaay, Doɗel, Joomanndu, Koylel, Suray, Cubalel, Kayhayɗi, Doondu, Aali Wuuri, Horndolde haa addan maa e Ƴella, njaatigi batu nguu.
Ƴella fof e mawnude innde e darjude e nder cubalooji, Geno ena rokki ngo kadi ɓiɗɗo debbo basorɗo, keewɗo ñalaaɗe pattamlame e nder enɗam mum, e nder wuro mum Ƴella ngoo haa e saraaji maggo ko aldaa e paltoor. Darnde makko yettiima duɗe janngirɗe tuubakiri mawɗe e tokoose, duɗe seernaaɓe Quraana, yettiima cafrirɗe mawɗe e tokoose haa e nder wuro Waawnde, laamorgo ngalluure maɓɓe ko jiidaa e balle nawreteeɗe jamma feewde e roofolɓe ɓe caɗeele aduna keɓtii tawi ngalaa yaakoraaɓe. O wiyetee ko Cilaa Hammadi Cilaa Waddu. Ko kaŋko dey, haa hannde, ñaagii kadi nde batu Enɗam Maam Wad waɗata hikka e wuro maɓɓe Ƴella mbele omo daña hawritde heen, kaŋko e ɓesngu makko. Faandaare makko ko ƴellitde Ƴella e ƴellitde finaa-tawaa subalɓe e nder Ƴella. Nde fedde ndee jaɓani mo, o felliti runngaade denndaangal fere ɗee. Ko kaŋko jippini denndaangal hoɗɓe arnooɓe ɓee e galle makko. Ko kaŋko defii nguura mumen, njaram mumen e lelɗe mumen haa mbaynii.
Cilaa Hammadi Cilaa Waddu ko Ƴellanaajo walla Ƴellaŋke joom pellital e cuusal ngal heewaani e worɓe saka e rewɓe. O jooɗii ko Farayse, kaŋko e joom-galle makko wondude e ɓesngu maɓɓe. O wayrataa noon Fuuta kono heewi artirde mo tan ko addude balle walla hawritde e kewuuji doolnuɗi.
Mbiyen ñalɗi Ƴella mbaɗii faayidaaji keewɗi. Gaagaa nootagol Enɗam Maam Wad, teddule baɗaaɗe ɗee, ganndondire e jokkondire cañaaɗe heen ɗee, Cilaa Hammadi Cilaa addii kadi ngenndiyaŋkooɓe mawɓe, nantuɓe inɗe mumen e nder Ƴella. Ena e ɓeen Kaaliidu Buubu Manngaan, jeyaaɗo to Ƴaga Awgaale, Katante Leñol Kan mo Aañam Yeroyaaɓe e suddiiɓe mum ɗiɗo (Rugi Muusaa Bah e Faatimata Alasan Kan), Daawda Soh lollirɗo Yelle Haawa Soh mo Aañam Yeroyaaɓe, Hammoo Bayal Njenngudi Joop, pekaanyaŋke ŋanaa jeyaaɗo to Siiwre Caamɓe, Aamadu Sih lollirɗo Maccuɗo Pulaar mo Asnde Balla e Gelongal Fuuta, gorko Jiinge Jeeri. Cilaa addiraani ɓe mbele Enɗam Maam Wad, kañum tan, ena heeroroo ɓe, ena naftoroo ɓe kono ko mbele jamaanu ngarngu nguu e Ƴellaŋkooɓe njaatigeeɓe ñalɗi ɗii ena naftoroo humpitooji maɓɓe.
Gelongal Fuuta lollirɗo, Njaay Saydu Aamadu
