Eɗen mbaawi wiyde Sileymaani Kan dawliima. Ngalɗoo duɗal gonngal he natal hee, woni ko Wul Yenje. Mahi ngal ko Sileymaani Kan e peeje mum. Ko duɗal Pulaar, baɗiraangal jannginirde sukaaɓe he ɗemɗe mum en neeniije.
Sileymaani Kan fadaani haa laamu ara mahande ɗum duɗal ngam yo taaniraakon mum njanngir heen ɗemɗe mum en. Ɗumɗoo dee ko yeru kollitoowo fiɓnde tiiɗnde, e golle laatiiɗo.
Kono ɗum haawaani en sibu eɗen nganndi, mawɗo Sileymaani Kan jeyaa ko e fuɗɗuɓe jaŋde pulaar he nder Muritani. Ko he sosɓe Fedde Ɓamtaare Pulaar he Muritani e hitaande 1974, dariiɓe ine njanngina, haa fedde ndee heɓtinaa ñalnde 4 suwee 1976, o toɗɗaa yo o ardo ɗum. O ardii fedde ndee haa 1980, nde o toɗɗaa yo o ardo Duɗal Ɗemɗe Ngenndiije. Heen o woni haa hitaande 1999, nde duɗal ngal fusaa ndee. Gila ndeen o waɗti galle makko ɗoo he Nuwaasoot e kala ɗo o woni, ko duɗal, kanko e hoore makko omo janngina pulaar, omo hebla yimɓe arooɓe he makko, omo winnda. Kadi haa hannde omo softi, omo darodii e FƁPM he kala darnde ummanii. He hitaande 2021 fayi 2022 o darodiima e fedde ndee he jokkondire baɗdaaɗe e laamu walla baɗdaaɗe e hoohooɓe ngam sarde dallinannde pelle pinal ɗee, faatunde e laawɗingol ɗemɗe ngenndiije kam e naattingol mum en he duɗe laamu.
E ooɗoo sahaa mo njahraten duɗal ngal bilaama, heddii ko raakde ɗum e waɗde heen kaɓirɗe : jooɗorɗe, geɗe janngirɗe, gila e defte haa kaɓirɗe goɗɗe… Ballal mo woni kala ine hatojinaa : so mbuuɗu mum, so kaɓirɗe mum, so defte mum ekn.
Nduwo-ɗen, yo Alla juutnu balɗe makko, moƴƴina battane makko. Aamiin
Fooyre Ɓamtaare
Yo Geno yoɓ mo moƴƴere duumiinde