Altine 6 colte (feebariyee), waktu 4 e hojomaaji 17 (w4 :hj17), leydi yerɓi to Turki e Siiri. Caasal yerɓannde ndee ko 7,8 e daawirde Richter. Nokku ooɗoo ine heewi yerɓude, kono ndeeɗoo yerɓannde ko moolanaande, hono mum wayrii gila hitaande 1 114. Hojomaaji 10 pawtii heen, leydi ndii jaaɓtini kadi, yerɓiti yerɓo 6,7 caasal ! Tee, caggal ɗuum, jerɓite ine njokki waɗde. Kono, ko ɓuri haawnaade koo, yerɓo leydi woɗngo, ngo 7,5 caasal waɗii w13 :hj24 bannge rewo : ngoo yerɓo wonaa jaaɓtal. Yerɓo ngoo waɗi ko he keerol hakkunde Turki e Siiri, ngo waɗii ko ine tolnoo e 40 000 pawɗe maayɗo.
Nokku oo ko nokku pottital hakkunde lare leydi keewɗe. Ko ɗuum waɗi mo heewde yerɓude. Won e nokkuuji Ngaawe ɓuri heewde yerɓude. Ɓuri saabaade ɗum ko ɗiin nokkuuji ngoni ko he peece lare-leydi. Ngaawe ine waɗi 53 laral ɗe ndiƴaani ɗo gootel, dillirooje seese, kono kam dillooje, ine nduñondira heen sahaaji, pawpawtondira heen sahaaji, ɗe ngoogondira, ɗe mbayloo ekn. Ko ɗeen dille keewi yerɓinde leydi. Lare ɗee ko lare kaaƴe. Ɗe mbayi ko no rosoor nii, aɗe tiɗɗoo, tiɗɗitoo. Won ɗo ɗum yettotoo tan, ɗum hela, lare ɗee pawpawtondira e banngeeji ceekol leydi ngol, jibina yerɓo leydi. Leydi Turki ndii jooɗii ko he laral leydi biyeteengal laral Anatoli, gootal e lare leydi ɓurngal famɗude e lare leydi Ngaawe (Leydi men ndii).
yo geno won ballo a weltanaama