Maruk ɗaɓɓii naatde e CEDEAO

0
2576

Caggal naattugol e Dental Afrik, laamɗo Maruk, hono Muhammed VI ɗaɓɓii naatgol Maruk e Dental faggudu dowlaaji hirnaange Afrik, hono CEDEAO.  Eɗen ciftora e diskuur mo o waɗnoo to Adis Abebaa, ɗo o ñiŋnoo no feewi doŋkugol Dental Magreb Arab (UMA) waɗde huunde, o teeŋtini nafoore wonnde e cosgol dente diiwaniije coftuɗe, haa teeŋti noon e CEDEAO : « annoore Dental Magreb Arab ñifii, sibu nattugol goongɗinde jiydigol nafoore », hankadi Maruk hiisii « ko Afrik woni galle mum paarnorɗo ».

Ɗaɓɓaande ndee waɗaa ko ñalnde aljumaa 24/02/2017 rewrude e haala laamɗo oo e hoore mum kam e bayyinaango ɗo feeñninaa wonde Laamu Maruk habrii sokna Ellen Johnson Sirleaf hooreejo leydi Liberiyaa, gardiiɗo CEDEAO e oo sahaa, yiɗde mum jeyeede e ngalɗoo dental.  Ina feeñi heen wonde Maruk « ina jaɓi doosɗe cosɗe CEDEAO ɗee  » tee « ina huuɓni sarɗiiji jeyegol e dental ngal ». Bayyinaango ngoo mantii no feewi dental ngal « sibu mum jeyeede e dente ɓurɗe yahrude yeeso e nder Afrik”. Ngo siftinii 23 njillu laamɗo oo waɗi e nder  11 leydi diwaan oo, siifondiraa heen nanondire gollondiral keewɗe. Ina wiyaa heen wonde ko Alla waɗi, ko e oo nokku Maruk jeyaa, tee ko « ɗoo wallidiiɓe mum politik ngoni ». Ɗum jiidaa e gollondire to bannge faggudu ɓurɗe tiiɗde.

Ndee feere ina woɗɗondiri e politik goɗɗitagol leyɗe worgo Saharaa, mo Muritani rewi ko ina wona duuɓi jooni, gila yalti dental ngal ñalnde talaata 26/12/2000. Eɗen ciftora ñiŋooje ardiiɓe leydi ndii feewde e CEDEAO nde ummanii woppinde Yaayaa Jaame laamu caggal nde hawaa e woote. Ko ɗuum kadi feeñi  e fitina caabiiɗo ƴeeŋtingol awooɓe senegaalnaaɓe e tufɗe awo Muritani, ɓe nganndu-ɗaa gila dawaa dawi ko kañum en kuuɓnatnoo soklaaji Muritaninaaɓe to bannge liɗɗi.

So ɗaɓɓaande Maruk ndee jaɓaama, Muritani waytata e diiwaan hee ko no Gammbi wayi e Senegaal nii, alaa no waawoyta waɗde, so wonaa naattude heen, walla fekkorde.

Bookara Aamadu Bah

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.