Jaŋde to Danemark : ekkaade « yiɗande banndum ko yiɗani hoore mum »

2
4047

Leyɗeele tati rewo Orop (Danemark, Suwed, Finlannde)  ina keewi limtaneede yeruuji moƴƴi to bannge jaŋde, ɓamtaare, njuɓɓudi renndo, weytaare ekn… Yeru, to Danemark jooni, ina waɗɗinaa e sukaaɓe yahrooɓe hakkunde duuɓi 6 e duuɓi 16, janngineede, nder ekkolaaji maɓɓe, binndanɗe paatuɗe e  moƴƴinde koɗdigal e yurmondirde.

Ekkaade « yiɗande banndum ko yiɗani hoore mum »

Won yahruɓe yeeso no feewi to bannge yiɗde moƴƴinde gondigal, jurmondiral, moƴƴondiral hakkunde aadee en. Yeru to Danemark. Toon, ina waɗɗinaa e sukaaɓe yahrooɓe hakkunde duuɓi 6 e duuɓi 16, janngineede, nder ekkolaaji maɓɓe, binndanɗe paatuɗe e « waawde anndannde banndum ». Ɗuum woni ko Farayse wiyata « empathie ». Ko ɗum kattanɗe « waawde ƴeewde e hoore mum », ngam waawde wallude neɗɗo, walla faamande ɗum, faamde golle mum keeriiɗe (ceertuɗe eɗe maa). Ɗumɗoo ina addana cukalel waawde teskaade e waɗtude hakkille e woɗɓe, waasa tan ƴeewde hoore mum, ekkoo faamande woɗɓe, faamde caɗeele mum en, mbelemma mum en e mette mum en, ekkoo « yejjitde hoore mum » e waɗtude hakkille e woɗɓe… walla, e raɓɓiɗinaade mbiyen “haɓde e hooram-hooramaagu”.

Sikke alaa mo tinanaani neɗɗo, waawataa yurmaade ɗum saka faabaade ɗum. Danemark noon ina anndiraa wonde leydi ɗo « yimɓe mum ɓuri weytaade » e winndere ndee. Ko goonga wonaa ɗee binndanɗe caabii ɗum, geɗe goɗɗe renndo e faggudu (ina heen peccitagol ngalu leydi) ina heen, kono eɗen paami kam, etaade mahde ɗum e jikkuuji sukaaɓe gila e law, maa wallitoy geɗe keddiiɗe ɗee, hono jurmondiral e ballondiral, e heblude hoohooɓe yurmoytooɓe ɓesnguuji mum en.

E nder binndanɗe hee, sukaaɓe ɓee ekkintee ko janngude, faamde e heɗaade ngonka woɗɓe. Yeru, ɓe kollee nate sukaaɓe woɗɓe wonɓe e sifaaji keewɗi ceertuɗi : yuŋginiiɓe, surwuɓe, hulɓe, weltiiɓe, ñirɓiniiɓe ekn, ɓe mbiyee yo ɓe cifo heen ngonka kala. Ɗuum fof ko mbele aɓe mbaawa « ardinde ballondiral dow daɗndu walla ɓuraa-ɓuraa ». Yontere kala sukaaɓe ɓee ina njannginee ɗum fotde waktu, mbele ɓe mbaawaa « waɗtude hakkille e weytaare heddiiɓe », weytaare yimɓe ɓe ɓe ngondi, heɗaade ɗum en ngam waawde faamde ɗum en no moƴƴi, waasa wiyde ina ñaawira ɗum en faamamuya hoore mum tan, huunde addanoore ɗum janngo e jam ustude hooram-hooramaagu caabotoongu yoorɓerndaagu, e ŋakkeende muñondiral ekn. Sibu so neɗɗo yiɗii hoore mum haa ɓurti, goɗɗo waawaa dañde nokku e ɓernde mum ; “neɗɗo ko maa waawa yejjitde hoore mum seeɗa nde waawa waɗtude hakkille e woɗɓe, yurmaade ɗum en e wallude walla wallondirde e mum en”.

Mbele wonaa ɗuum woni ko Nelaaɗo Alla, (mo Jam e Kisal ngoni e mum) wasiyii juulɓe nde wiyata : « Goongɗingol neɗɗo timmataa so wonaa nde o yiɗani banndiiko, ko o yiɗani hoore makko koo ».

Bookara Aamadu Bah

2 JOWE

  1. Seydi Bah!
    A jettama e ngoo firo winndannde e ɗemngal men. Minen Almuɓɓe taroo pulaar-fulfunde, emin mbeltii darmde maaɗa to dunnu binndol e ɗemngal men, sabu ko winndaa ɓuri welde moofutde.
    Emin njaarmaa kadi, kaaɗdi nguurndam. Yo a wuur 150 hitaande wundude e kuuɓtinngal ɓanndu, aameen, haa e men❣️

  2. A jettama e ngoo firo winndannde e ɗemngal men. Minen Almuɓɓe tarooɓe binndi pulaar-fulfunde, emin mbeltii darmde maaɗa to dunnu ɓamtirgol binndol e ɗemngal men, sabu ko winndaa ɓuri welde moofutde, kam e fanndinnde ganndal.
    Emin njaarmaa kadi, kaaɗdi nguurndam. Yo a wuur 150 hitaande wundude e kuuɓtinngal ɓanndu, aameen, haa e men.

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.