Paandaale ndee ɗoo dallinannde pelle pinal ko :
- sifaade ŋakke e leelte teskaaɗe nder ciynugol Mbayliigu TNJ ngonaangu nguu caggal bayyingol Sariya Kuccam paatuɗo e jaŋde leydi ndii ñalnde 5 oktoobar 2022, e caggal cosgol Duɗal Ɓamtaare e janngingol ɗemɗe ngenndiije (dekere 029/2023 mo 25 sulyee 2022), kalfinaangal heblude naattingol pulaar, sooninke e wolof nder jaŋde leydi ndii.
- Sakkitde kuule newiiɗe ngam moƴƴinde ciynugol ngol.
I. NGONKA
Geɗe garooje ɗee ine jeyaa e ko ɓuri maantinde e ngonka hannde kaa :
1. Keewgol mbayliigaaji tippuɗe laamu e sahaa mbayliigu TNJ : e nder lebbi 18 jaagorɗe 4 ndeggondirii e gardagol jaagordu Jaŋde.
2. baasgol dekereeji ciynirɗi sariya kuccam kaa winndeede haa hannde.
3. Jenngugol compugol goomuuji dowrowi kalfinaaɗi rewindo mbayliigu nguu, haa arti noon e Goomu ngenndi rewindo mbayliigu, e Goomu ngenndi kalfinaangu « kirikilaaji » (hono paandaale jaŋde ndee, loowdi, laabi, ɓeto, kaɓirɗe (ine heen defte janngirɗe, heblo moƴƴo jannginooɓe).
Ine moti ciftinen wonde hujja jooɓtoranooɗo nde jarribo jaŋde ɗemɗe ngenndiije dartintenoo e daawal 1979-1988 ndee, haaɗtinaa tan e jaŋde lesre, ko baasgol woodde kuule sariya paatuɗe heen. Ko noon ne kadi ko jaagorgal jaŋde ndeen ngal tan welanoo, kañum gooto tan ƴetti feere dartinde jannginirol pulaar sooninke e wolof no ɗemɗe jokkondiral nii.
4. Ŋakkeende gardingol miijo e lelnugol peeje
– IPELAN fof soseede gila e desaambar 2022, eɓɓaaka e ɓeto kaalis hitaande 2023 ndee. Yanti heen ko ɓetanaa e ndeeɗoo hitaande 2024 (146 miliyoŋ MRO) ine famɗiri paandaale e kimmugol naattingol jaŋde ɗemɗe ngenndiije pulaar, sooninke e wolof he nder jaŋde leydi ndii, kam e ɓamtugol mum en.
5. Ŋakkeende keblugol huunde e pellitte kimmuɗe baaɗe no :
Jaltingol jirlotoongol (sirkileer) Jaagordu jaŋde ñalnde 8/12/2023 daɓɓiroowol ardiiɓe Duɗe Keblorɗe Jannginooɓe (ENI-iji) nde ƴettata kuule ngam naatnude ko famɗi fof ɗemngal ngenndiwal goɗngal (tawta arab) ñalawma gadano ɓamtugol jaŋde caggal poofte gadane hitaande jaŋde ndee 2023-2024 (darorɗe saawiyee), lajal ñoosingal no feewi, tawi heblooɓe keblaaka, loowdi jaŋde heklaaka.
6. Ŋakkeende kumpital laamu paatungal e ɗemɗe ngenndiije pulaar, sooninke e wolof nder TNJ : njilluuji keewɗi ɗi jaagordu jaŋde yuɓɓini e nder diiwanuuji leydi ndii ine potnoo wonde fartaŋŋe humpitte yimɓe ko faati heen.
7. Ŋakkeende jeeyngal (oorngal) laamu ngam famminde e hirjinde ɓesngu nguu, jaayɗe ɗee e yimɓe gollotooɓe heen ɓee, haa teeŋti noon e jannginooɓe, e jinnaaɓe almuɓɓe, e almuɓɓe e yimɓe huufooɓe golle ɓee, e Pelle ɗe ngonaa laamu, ekn.
II. CAKKITOOJE
E fawaade e ko ɓenni koo, pelle pinal ɗee ine cakkita juɓɓule toppitiiɗe ɗum ɗee kuule garooje ɗee ngam reenaade urñaade e golle ɗe keblaaka, miijaaka :
1. Lelnugol dekereeji ciynugol mbayliigu jaŋde nguu ko adii mars 2024 mbele goomuuji golle ɗii ine mbaawa fuɗɗaade golle mum no feewirta nii :
– dekere ciynugol kuulal 65 sariya kuccam paatungal e jaŋde ɗemɗe ngenndiije ;
- – dekere ciynugol kuulal 66 sariya kuccam paatungal e jaŋde ɗemɗe koɗe ;
- – lelnugol winndannde sariya heeriinde dottoore laabi ɗowooji ko faati e karallaagal kesal (enformatik) ciynangal e nder ɗemɗe (ko wayi no firo, kelmeendi, e fannuuji enformatik goɗɗi), tawi ko laabi potɗi huutoreede e nder TNJ leydi ndii.
2. Lelnugol e ciynugol ɗowol golle (feuille de route) pacciroowol haa laaɓta denndaangal golle potɗe waɗeede ngam naattinde ɗemɗe ngenndiije pulaar, sooninke e wolof nder ekkol :
- – Kaaɗnugol heblo ngoo e duuɓi tati (3) (2024 haa 2027) e huɓtodinde jaŋde ɗemɗe ngenndiije ɗee he udditgol hitaande jaŋde 2027-2028 ;
- – Fuɗɗaade keblugol naatnugol jaŋde ɗemɗe ngenndiije ɗee e nder duɗe hakkundeeje (kolees) tuggi 2027-2028 ;
- – Lelnude laabi e kaɓirɗe jaŋde (kirikilaaji) :
- o Heblo jannginooɓe ;
- o Heblo defte janngirɗe e kaɓirɗe jaŋde e ekko ;
- o Heblo jannginooɓe e nder ɗemɗe ngenndiije ɗee nder Duɗe keblorɗe laamu (ENI-ji) ;
- o ɓetooji
- o daawal kuɓtodingol jaŋde ɗemɗe ngenndiije ɗee nder duɗe leslese ;
- o keblugol naatnugol majje nder duɗe hakkundeeje.
3. tafgol sato wallitoowo juumtugol mbayliigu jaŋde nguu :
- a) sakkitde laawɗingol ɗemɗe ngenndiije ɗee ;
- b) oorle jaŋde mawɓe nder ɗemɗe ngenndiije ɗee kala ;
- c) naatnugol ɗemɗe ɗee kala nder Duɗe e Nokkuuji keblooji, e duɗe jaaɓi-haaɗtirde, e Duɗal Toowngal Keblorgal jannginooɓe.
4. E joofnirde, Jokkorde Pelle pinal ɗee ine adda ballal mum e lelnugol dekere ciynugol paatuɗo e tippondiral ɗemɗe nder jaŋde hee. (rutto e dallinannde pelle ɗee).
Paamen tan e toongol : E jaŋde lesre ndee, tuggi hitaande adannde haa jeegoɓere, cukalel fof janngirta fannuuji ɗii fof ko ɗemngal mum neeniwal. Kadi ngel jannginee heen ɗemngal ngenndiwal goɗngal. E hitaande ɗimmere ngal ɓeydanee heen Farayseere. E hitaande adannde kolees, ngel ɓeydanee heen ɗemngal Engele…
Jokkorde pelle pinal ngenndiije
Siilo (saawiyee) 2024
