Golle AJEEK  e nder Dimmbee

0
180
Ajeek Kayhayɗi
Ajeek Kayhayɗi

Fedde AJEEK  ko fedde sukaaɓe janngooɓe e duɗe hakkunndeeje haa e duɗe jaaɓi haaɗtirde. Nde sosaama  gila e hitaande 2012 e miijo hol ko sukaaɓe Kayhayɗinaaɓe poti gollaade e sahaa guurte mawɗe ɗee ? Ɓeen sukaaɓe ngoni almuɓɓe janngooɓe e duɗe hakkundeeje ɗee haa e sanɗaaji janngooji to Duɗal Jaaɓi haaɗtirde. Faandaare maɓɓe ko addude ballal e fannu jaŋde e laaɓal (laaɓal woni afo cellal), e cellal (waɗde jeewte hirjino taariindi, aawde leɗɗe) e nder mbaydi ƴellitaare duumiinde komiin Kayhayɗi. Hannde ko fedde heɓtinaande to bannge jaagordu toppitiingu geɗe nder leydi. Fedde ndee golliima ko heewi haa teeŋti to bannge jaŋde : hitaande kala, e sahaa guurte, eɓe njanngina sukaaɓe wuro ngoo e dow yarlitaare, tuggi tolno jeegom duɗe les, haa tolno jeeɗiɗi  duɗe hakkundeeje. Nde tawnoo ko fedde timmunde, eɓe njanngina sukaaɓe ɓee yoga e fannuuji janngeteeɗi ɗii. Ngalɗoo gollal ina wallita sukaaɓe ɓee no feewi, ngam teskaade caɗeele hannde to bannge tolnooji.

E yeru tan, e hitaande hikka ndee ɓe keɓii winnditde 258 suka (rewɓe 142  e worɓe 116)  nder jannginirɗe 8. Jannginooɓe  25 yarlitiiɓe mbaawii heblude sukaaɓe ɓee e nder  lebbi ɗiɗi. Hannde ina jeyaa e caɗeele guuraaɗe sifaa jaŋde ndee, tolnooji sukaaɓe  ɓee ina ngustii no feewi, kawgelaaji Bak, Berwe e naatgol duɗal hakkundeewal  enen fof eɗen nganndi no siforii. Laamu e luulndo fof ina njaɓi jaŋde yahaani.

AJEEK noon addii ballal mum, heddii ko laamu, pelle joom kopporeeje e jinnaaɓe sukaaɓe nduusa ɓe e ngal  daawal. E miijo Hooreejo AJEEK, hono Aamadu Sih, Fedde ndee wuuri ko e piye nde tawnoo kamɓe fof ko ɓe yarlitiiɓe, ɓe ɓuri mawninde  ko jaŋde, sahaa eɓe ndaña ŋakkere jannginooɓe, walla kadi jannginooɓe ɓe ñiiɓaani. AJEEK heblii sukaaɓe heewɓe to fannu jannginol e haaliyankaagal. Ñalnde alet 17 silto ɓe njuɓɓinii hiirde mawnde, ɓe mbismiima hoohooɓe heewɓe  ngam hokkirde njeenaaje sukaaɓe ɓurɓe liggaade ɓee. Cukko Meer kayhayɗi hono Abuu Siisee hollii weltaare mum wiyi kadi ɗoo e duuɓi joyi garooji, maa komiin addu ballal mum hitaande kala so Alla jaɓii.

Usmaan Ñaan

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.